Nyopning på Sæbøvik

Torsdag kunne Spar Sæbøvik på nytt opna dørene etter å ha halde stengt for renovering. Nyopninga vart feira med blautkaka og kaffi.

Denne dagen var det fullt i folk inne på Spar, og dei fleste tok seg god tid til å slå av ein prat og gjere seg kjende med den nye lokalbutikken.

– Det har vore ein del folk innom, folk likar litt kaffi og kaka, fortalde Benedikte Bjørnevik i om lag 10.30 tida torsdag.

Då hadde dørene vore opne sidan 08.00, men kaka vart ikkje spretta før rett over klokka 10.

– Til no har det gått ei kaka, men vi bestilte tre, så det skulle vera nok til alle som vil ha, fortel dagleg leiar Bjarne Bjørnevik.

Totalrenovering

I ti dagar har butikken vore stengd for oppussing. Ein plass mellom 30 og 40 arbeidarar inkludert dei faste tilsette har stått på kvar einaste dag for å få butikken klar til nyopning.

– Vi har skifta alt av kjølar og frysarar, fått nytt ventilasjonsanlegg, nytt elektrisk, alle maskinar på kjølerommet er bytta ut og vi har hatt full endring på alt, rett og slett ein total renovering, fortel Bjarne.

Dei har endra på oppsettet på hyllene, auka frysekapasiteten og fått opna opp mellom hyllene. Likeins med Spar Uskedalen har dei skifta til ny profil som skal gje ei litt større romkjensle og litt betre oversikt i butikken.

– Vi har òg pussa opp på kjøkenet og pauserommet, malt kontoret, fått nytt stort fryserom på lageret, og vi har fått tre nye sjølvskanningskassar, det har vi ikkje hatt før. Alt ein kan tenka seg har vi heldt på med desse dagane, ler Bjarne.

Gjengen på Spar Sæbøvik haldt på til langt på kveld onsdag for å gjere klart til opninga.

– Det har vore mykje rydding og småputl no på slutten, vi måtte jo til dømes henga opp alle priser etter at varene var kome på plass, fortel ein noko letta Bjarne.

– Og så er det ikkje så tronge hyller der ein ikkje klarar å gå forbi andre. No har ein god plass til å både handla og slå av ein prat, smilar Bjarne.

Lojale kundar

Etter stengetid laurdag 7. oktober gjekk arbeidet i gong, då det kom folk som skulle riva ut alle kjøleskap og frysarar klokka 9 dagen etterpå. Heldigvis var det ikkje så alt for mykje igjen i fryse- og kjøleskap.

- Den laurdagen hadde vi alle kjøle- og frysevarer til 50%, og det var heilt ribba etterpå. Eg hadde aldri trudd det skulle gå så mykje, men det var tomme hyller over alt, fortel Benedikte, og legg til;

Folk var altså flinke til å handla slik at ryddeprosessen vart kortare, og nokre handla inn for heile perioden Sparen var stengd.

– Vi hadde jo forventa at folk ville reisa til Husnes for å handla medan vi heldt stengt, men eg har snakka med fleire i dag som seier dei har venta med å handla til vi opna igjen, fortalde Benedikte.

– Så folk er lojale?

– Ja veldig, og det er jo så kjekt, vi set stor pris på det, smilte ho.