Kristoffer vil jobba for bygdeutvikling og kollektivtransport

Den yngste representanten i kommunestyret er klar på kva han vil jobba for i Kvinnherad-politikken.

Blant dei fem yngste i kommunestyret finn vi fire som truleg kjem til å bli ganske profilerte politikarar dei neste fire åra. Både ordførar Vegard Bjørnevik og varaordførar Thea Vaage er på lista, det same er formannskapsmedlem Per Harald Havnen Löfgren Johansen, medan Stine Hatteberg er nestleiar i det såkalla klageutvalet.

Men den aller yngste i det nye kommunestyret er Høgre-representanten Kristoffer Tufta, født i 1998.

– No er eg 25, så eg er ikkje så ung lenger, konstaterer han til Grenda etter sitt aller fyrste kommunestyremøte.

Han stod på 9. plass på Høgre si liste føre valet, og der enda han også. Men sidan partiet fekk ni representantar i kommunestyret, kom han altså inn på fast plass.

– Eg hadde eit ynske om å koma inn, og vart veldig glad då eg hamna så høgt på lista under nominasjonsmøtet. Eg skjønte då at viss valet gjekk like bra som sist, så låg eg bra an. Eg gler meg til å tala ungdomen si sak, fortel han.

Ny jobb

Kristoffer Tufta er utdanna innan økonomi/administrasjon og historie. For to månadar sidan starta han i ny jobb hjå dataselskapet Adonis AS i Røo på Halsnøy. Stillingstittelen er Junior Support Consultant.

Utanom vervet i kommunestyret, står han oppført som 6. vara til levekårsutvalet. Kristoffer er snar når vi spør kva saker som opptek han mest.

– Bygdeutvikling og kollektivtransport. Eg har budd i Bergen og vart ein tilhengar av å reisa kollektivt. Ideelt sett skulle Bybanen hadde endestopp i Høylandsbygd, smiler han.