INP får plass i alle utvala – Rødland i formannskapet

Her er kabalen som INP har lagt når det gjeld fordeling av verv.

Denne veka har både dei fire partia i posisjonen og dei fire partia i opposisjonen offentleggjort kven som skal ta på seg ulike verv. I formannskapet har desse to grupperingane fire plassar kvar, medan den siste går til Industri- og Næringspartiet (INP), som har avslege samarbeid med nokon andre. Deira fyrstekandidat Jostein Rødland frå Ølve stadfestar onsdag at han skal inn i formannskapet.

– Det blir spennande og veldig kjekt. Eg har ikkje politisk erfaring, men det går sikkert bra. Og så blir det spennande å sjå kva oppgåver som kjem, seier han til Grenda.

– Du er klar til å gje gass?

– Ja, eg skal gje gass, det må ein gjera når ein har kome så langt, smiler han.

Findressen

Rødland legg til at INP har sikra seg plass i alle dei meste sentrale utvala. Partiet fekk fem personar inn i kommunestyret, og det er dei same fem som tek seta i utvala. Utanom Rødland, ser den kabalen slik ut (så sant den formelt blir godkjent i kommunestyret):

* Forvaltningsutvalet: Gunnar Helleland frå Dimmelsvik.

* Levekårsutvalet: Heidi Bolette Jakobsen frå Høylandsbygd.

* PTM-utvalet: Åge Aakre frå Herøysund.

* Kontrollutvalet: Thomas Eide frå Uskedalen blir her nestleiar.

– Er de nøgde med utfallet?

– Ja, vi er veldig nøgde. Vi har kome inn i alle utvala, og det er jo der politikken vert utforma, seier Rødland, som stiller i haustens fyrste kommunestyremøte torsdag.

– Då blir det å ta på seg findressen, humrar han.