Løp og opning – Storhelg for Ternen

Både laurdag og søndag slår IL Ternen på stortromma, med Erslandsvatnet Rundt og opningsfest for Erslandsparken kvar sin dag.

– Me tar dette same helga, for det er i stor grad dei same folka som er involverte i begge deler. Dermed legg me berre beslag på éi helg for dei, argumenterer Iver Blokkum.

Han er leiar i IL Ternen, og gler seg til det som står på programmet. I alle fall til at løpsklassen under Erslandsvatnet Rundt er ferdig i 1145-tida på laurdag.

Låg terskel

– Det er eit 3,8 km langt turløp. Me sender turklassen ut i god tid før løpsklassen startar, slik at det er litt publikum ute i løypa eller i målområdet når løparane spring rundt. Eg veit om mange som skal vera med, og me oppfordrar folk til å utfordra naboar og familiemedlemmer, seier Blokkum.

Det er ikkje eit langt løp, og Blokkum lover at du kjem gjennom – uansett kondis.

– Ein må koma seg ut og visa at det ikkje er så farleg å delta i løp og konkurrera. Eg skal sjølv vera listefyll, nokon må vera det også, humrar han.

IL Ternen er gått vekk frå motbakkeløpet Varden Opp.

– Det er lågare terskel for å vera med rundt vatnet, her kjem ein gjennom uansett treningsgrunnlag. Varden Opp var også meir sårbar for vêret. Men for all del, meldingane tilseier at ein blir våt uansett, slår Blokkum fast.

Etter løpet blir det kafé og litt leikar for barna, samt premieutdeling.

Opningsfest

Ternen IL er ikkje ferdige med sine arrangement denne helga, sjølv om turløpet er runda ferdig før lunsj laurdag. Søndag er det opning av Erslandsparken, med høgtidleg snorklypp.

– Den oppgåva går til ein av dei yngste i klubben, med Ternen-dressen på, sjølvsagt. Me vil at dei som parken er laga for skal få stå for opninga, påpeikar Ternen-leiaren.

Etterpå blir det ein runde rundt rulleskiløypa, prat om korleis parken og prosjekt blei til, og Hordaland Skikrets og Ternen stiller med testing av rulleski der ein er mest komfortabel med det, enten det er i løypa eller på flate marka.

– Ta med skisko og hjelm, oppmodar Blokkum.

Leiar av skikretsen, Sandvoll-bygdas eigen Bernt Rusten kjem. Blokkum lokkar med servering av kaffi saft og kaker, og inviterer bygdefolk, dugnadsfolk og skiinteresserte til opningsfesten.

– Kor kjekt er dette?

– Me syns det er veldig kjekt, og eit unikt anlegg som legg til rette for både fotball og rulleski. Fotball er det i kvar bygd, men det er kjekt for bygda å få kunstgras her. Aktiviteten er stor allereie, kvar kveld er det nokon som er der og kosar seg, fortel Blokkum.

Bra for langrennsmiljøet

Å prøva å utvikla skiaktiviteten, tykkjer han også er kjekt.

– Dette er ei kupert løype som lar deg testa alle stilartar. Her får du nokre av dei bratte kneikane som du får i skiløypene, men som du ikkje får om du trenar på rulleski langs etter vegane i Kvinnherad. I denne løypa får du utfordra deg, meiner han.

Blokkum har lodda stemninga i skikarusellgruppa for fellestrening i løypa i barmarksperioden.

– Det hadde vore kjekt å få til eit samarbeid i sommarhalvåret. Å trena teknikk i sikkert, trafikkfritt miljø blir stas, seier han.

Rulleskiløypa blir lyssett fram til kl. 21 på kvelden, medan det blir appstyring av lyset på fotballbanen. Kunstgrasbanen er 40 gonger 60 meter, og har sand som ifyll.

– Me har lagt på 10 kg sand pr. m2 for at han ikkje skal blåsa bort. Banen er også bygd med murar rundt, så han hadde følgd krava til reinsing om me hadde hatt gummigranulat på han, orienterer Blokkum.

For dei som tar turen éin eller begge dagane, oppmodar Blokkum til parkering enten ved Sandvollstova eller ved steinbrotet.

– På skuleplassen kjem me ikkje til å sleppa inn bilar, sluttar Ternen-leiaren.