47 prosent valdeltaking så langt

I dag er siste dagen for å røysta i kommunestyre- og fylkestingsvalet. Då Grenda var innom røystelokala i Rosendal klokka 12 var det om lag 800 som hadde røysta allereie i dag.

Tala får vi frå økonomisjef i kommunen Niels Jakob Erlingsson, som har telt førehandsrøyster i heile formiddag.

– Totalt er det kome inn 3403 førehandsrøyster, det er 32,7% av dei røysteføre. Det er ei auke på 7 prosent samanlikna med valet i 2019, kan han fortelja.

Med så gode tal på førehandsrøysting ser det ut til at nokre av initiativa med tilrettelegging ser ut til å ha fungert.

– Vi har jo til dømes hatt røysting i bokbussen og på matbutikkar, og det ser ut til at det har gitt resultat. Det blir spennande å sjå om det er fleire som røyster i år eller om folk berre har byta ut valdagen med førehandsrøysting, fortel Erlingsson.

Det har vore auke på røyster i heile kommunen, men spesielt på Halsnøy, der dei har ei auke på 12,4% førehandsrøyster. På Husnes er det ei auke på 6,8%, Rosendal 5,5% og Hatlestrand 3,9%

Treng minst 1500 fleire

I 2019 var det totalt sett ei 62,8 prosent valdeltaking i Kvinnherad. Til no i år er talet oppi 47 prosent.

– Vi treng om lag 15 prosent fleire stemmer for å koma opp på same nivå som førre val. Det når vi dersom om lag 1500 fleire brukar røysteretten sin, seier Erlingsson.

Då Grenda var innom hadde dei registrert 1341 stemmar frå søndag og måndag morgon. Om lag 500 røysta i går og 800 så langt i dag.

Valmedarbeidarane i gymsalen på samfunnshuset i Rosendal fortalde at det har vore ei jamn straum av røystande begge dagane.

Skuleval og debatt

Det var også fleire 10.klassingar innom vallokala, og dei fekk sjå demokratiet i beste velgåande. Frøya Sverresdatter Hatteberg, Viktoria Bakke Alfarnes, Helena Oftedal Hegland og Elvira Bondhus kunne fortelja at dei tidlegare på dagen hadde hatt partidebatt i skuletimen.

– Det var mykje meir spennande enn eg hadde trudd det skulle vera. Eg trudde ikkje at vi faktisk kom til å debattera og vera ueinige, fortalde Viktoria.

– Ja, eg var redd det kom til å bli kjedeleg og at ingen var heilt med, men det verka som om folk var «på», så det var kjekt, skaut Frøya inn.

– Miljøpartiet vart litt angripe under debatten, alle var imot dei, fortel Helena.

Som i ein vanleg debatt hadde dei med seg to ordstyrarar og fekk læra seg teikna for replikk og kommentar.

– Dei som fekk sagt mest var nok Høgre, MDG, Ap og Sp. Eg var Sp, og eg fekk sagt mykje av det eg ville, fortel Viktoria.

– Vi hadde og ein del ja og nei spørsmål, og om ein var ueinig med dei andre måtte ein gje ein grunn, som var veldig kjekt, seier Viktoria.

Dei fira jentene er alle einige om at dei kjem til å røyste når dei blir gamle nok. For no må dei nøya seg med skulevalet, som er spennande nok i seg sjølv.

Kyrkjevalet

Ved sidan av kommunestyre- og fylkestingsvalet sat valmedarbeidarar frå kyrkjevalet. Dei kunne fortelja om ei jamn straum med røystande. Kyrkjevalet har ein også kunna stemma på på internett i år, men kor mange som har nytta den sjansen er ikkje klart enno.