Kring halvparten vil førehandsrøysta – sjå nye tal

Det ligg an til at nærare halvparten av røystene ved kommunevalet i Kvinnherad kjem i form av førehandsrøyster. Spesielt er det mange frå Uskedalen som har stemt allereie.

Klokka 14.00 fredag er det slutt på førehandsrøystinga til kommune- og fylkestingvalet. Då står berre dei to valdagane, søndag og måndag, att. Lars Næs, som til vanleg er arkivleiar i Kvinnherad kommune, men i desse dagar det næraste vi kjem ny «valgeneral» etter Geir Mogren, var torsdag i formannskapet og informerte om status. Då hadde ein passert 3.000 førehandsrøyster i Kvinnherad. Til samanlikning var det totalt 2.649 førehandsrøyster under kommunevalet i 2019.

– Personleg hadde eg trudd vi skulle kome høgare. Men Kvinnherad er nummer 5 i Vestland fylke i andel førehandsrøyster, og det er bra. Innsatsen har vore stor for å få tak i røyster i heile kommunen. Valbussen/bokbussen har fungert veldig bra, oppsummerte Næs.

Han tykkjer naturleg nok det blir spennande å sjå kor høg valdeltakinga til slutt vert. I 2019 var det 62% i Kvinnherad som nytta røysteretten sin.

Varaldsøy og Åkra

Valmedarbeidarane tok to torsdagar på rad turen til fire av Spar-butikkane i kommunen (Halsnøy, Uskedalen, Rosendal og Hatlestrand) og sette opp mobilt stemmelokale.

– Det slo bra an, spesielt i Uskedalen var det stor suksess. Den eine dagen var det 97 som røysta og samanhengande kø frå kvart på tre til kvart over seks. Vi fekk 137 røyster i Uskedalen til saman for begge gongene, sa Næs.

Det har også vore ambulerande røysting andre stader. På Varaldsøy var det 41 som røysta, også i Åkra var det 41 som nytta sjansen. Desse tala er Lars Næs veldig nøgd med. Han er litt meir skuffa over oppslutninga i Mauranger der 18 røysta, og på Borgundøy der berre 7 møtte fram. På Kvinnherad vidaregåande skule vart det teke i mot 70 røyster.

– Det har kome veldig bra tilbakemeldingar på opplegget som har vore. Kjempebra, roste Ove Lemicka (Frp).

Dag for dag

I Kvinnherad er det i alt 10.397 røysteføre. Til og med torsdag 7. september hadde 3.107 av dei, altså 29,88% røysta. Grenda har tidlegare presentert ein dag for dag-oversikt til og med 29. august. Deretter ser lista slik ut:

30. august 85

31. august 354

1. september 133

2. september 55

3. september 0 (søndag)

4. september 247

5. september 281

6. september 190

7. september 294

Teljekorpset

Lars Næs orienterte også politikarane om kva som skal skje på måndag.

– Klokka 09.00 vil vi starta med ei manuell, førebels oppteljing av førehandsrøystene. Under den endelege oppteljinga, som startar klokka 12.00, skal valstyret vera til stades, så då må dåke vera der, sa han til valstyret som består av Hilde Enstad (Ap), Leif Sverre Enes (H), Hege Lægreid Røssland (SV), Ove Lemicka (Frp) og Gunnar Våge (Sp). Valstyret har elles som oppgåve å vurdera tvilsame røyster, samt røyster som av ulike årsaker er avviste.

Vallokala stengjer klokka 19.00 på måndag, og klokka 19.30 kjem teljekorpset for å starta det viktige arbeidet sitt.

– Kven som helst som ynskjer kan få observera teljinga, opplyste Lars Næs. Folk får rett nok ikkje gå inn i kommunestyresalen fysisk, men kan sjå på teljinga gjennom vindauga inn til salen.

Tv Bra

Valvaka i rådhuset startar klokka 19.00. Grenda byrjar si direktesending derifrå klokka 19.30. Også TV Bra skal vera til stades for å følgja Høgre-kandidaten Remi Nerhus. Tv Bra er ein landsdekkande kanal for og med utviklingshemma.

Resultata av førehandsrøystene vert offentleggjort klokka 21.00, men desse er ikkje sortert på krinsar. Kommunen kunne teknisk sett gjort det, men har ikkje lov. Resultata frå dei fire krinsane kjem fortløpande etterpå. Dette gjeld då berre røystene frå søndag og måndag.