Svar til Jostein Rødland, Industri- og næringspartiet

Viser til svaret på lesarinnlegget mitt frå ordførarkandidaten i Industri- og næringspartiet (INP), og som forventa skapte innlegget mitt debatt. Jostein Rødland fortener skryt for at han svarar på ein sakleg måte, og gjennom dette bidreg til eit godt debattklima. Ikkje alle som har deltatt i debatten om saka på Facebook og i avisene sine kommentarfelt, opptrer like ryddig.

Så har eg lyst til å komma med nokre kommentarar:

1. Eg nemnte klimasaka fordi dette ikkje berre er ei nasjonal og global sak. Klimakrisa er noko som vil påverka oss alle, og mange norske kommunar har dei siste vekene merka klimaendringane på kroppen. Dette er difor ei sak som absolutt høyrer heime i eit kommune- og fylkestingsval.

2. Eg har på ingen som helst måte kopla INP til ytre høgre, så her bør Rødland lesa nøye gjennom det eg skreiv. Eg stilte eit spørsmål om INP lokalt synes det er greitt at ein av partiet sine fremste talspersonar, Kjell Erik Eilertsen, omtalar meiningsmotstandarar som nazistar. Eg er glad for at Rødland og INP lokalt tar avstand for slike ytringar, men fekk ikkje svar på om ytringane til Eilertsen har fått nokon konsekvensar for hans tillitsverv i partiet som energipolitisk talsperson. Elles ser eg at fleire hevdar at det Eilertsen uttala er basert på ein forfalska Twitter-konto. All den tid Eilertsen har beklaga det heile, antar eg at det er han som har lagt det ut, og ingen andre.

3. Eg tar sterk avstand frå hersketeknikkar, og i alt eg gjer prøver eg å unngå å nytta meg av slike teknikkar. Så ser eg samtidig i ettertid at overskrifta på lesarinnlegget mitt kunne vore mindre spissformulert.

4. Oppfordringa mi om ein fair og ryddig valkamp som styrkjer ytringskulturen, gjeld alle parti som stiller til val. Det som står på trykk i Kvinnheringen om opplevingane som ordførar Hilde Enstad opplevde på ein valkampstand nyleg, gjer sterkt inntrykk på meg. Hendinga viser at vi har ein lang veg å gå, og vi har alle eit ansvar for å behandla kvarandre med respekt, uavhengig av kor vi står i det politiske landskapet.

MDG foreslo i vinter i Stortinget at PST skal få utvida mandat til å følgja opp hets og hatefulle ytringar retta mot mellom anna ungdomspolitikarar og lokalpolitikarar. I dag har PST kun mandat til å beskytta nasjonale myndigheitspersonar. Vi er svært glade for at PST/Politiet no har valt å følgja opp dette over heile landet, og eg reknar med at dei også følgjer med på det som kjem til uttrykk på ulike digitale flater.

Lykke til med valkampen og ha eit godt val!

Knut Førland

Listekandidat for MDG