Skule, oppvekst og psykisk helse – vegval for framtida!

I dagens samfunn er det avgjerande å investere i borna våre sin oppvekst og utdanning. Me veit alle at ein god skule og trygge oppvekstkår dannar grunnlaget for eit sterkt og inkluderande samfunn, der alle uavhengig av føresetnader skal ha like høve og rett til oppleve og bli sett som den dei er, og få ei kjensle av tryggleik og meistring i utdanning, jobb, idrett og frivillig arbeid.

Akkurat dette er noko som ligg mitt hjarte nært, eit felt eg har jobba tett på dei siste åra, og som eg no saman med Senterpartiet har eit brennande ynskje om å bidra til å forbetre i kommunen vår, ettersom me både har sett og erfart at det er behov for dette, og særskilt i oppvekst- og utdanningssektoren.

Me i Kvinnherad SP set mangfald og nærleik i sentrum, og har trua på ein skule som er tilgjengeleg for alle, uavhengig av geografisk plassering eller sosioøkonomisk bakgrunn. Me vil, og treng å styrkje nærmiljøa våre ved å utvikle dei lokale skulane i kommunen, sjølv om dette kan føre til endring jf. dagens skulestruktur. Ei slik endring kan bidra til å sikre ei kvalitetsutdanning, men og ei utvikling av ein trygg og inkluderande læringsarena der elevane kan utfolde seg og utvikle sitt potensiale. Borna våre treng eit inkluderande samfunn der alle skal ha like høve uavhengig av bakgrunn, funksjonsevne eller identitet. Ein inkluderande skule er ein stad der forskjellar blir sett på som ein styrke, og der kvar einskild elev kan blomstra.

Med vår politikk ynskjer vi i komande periode å setje søkelys på kvalitet i opplæring og sikre at alle born møter ei kompetent leiing med kvalifiserte lærarar i skulen, samstundes som alle skular skal ha eigen sosiallærar, med PPT lokalisert på skulen.

I eit samfunn som stadig vert meir komplekst ynskjer me å gi lærarane dei ressursane dei treng, og gi elevane ei utdanning som rustar dei for framtida, og skape eit samfunn der alle kan lukkast. Senterpartiet vektlegg verdibasert politikk med målsetjing om ei sterk og berekraftig framtid utan utanforskap.

Me sit i dag med ansvaret for å forme morgondagen, og i mine auge er det ingenting som er viktigare enn å gi borna ei god oppvekst og kvalitetsutdanning. Ein skule som fremjar likeverd og inkludering er hjarta i eit samfunn prega av samhald og vekst. Vi må saman arbeide for å redusere sosiale skilnader og hindre utanforskap, og vi må sørgje for å ha kompetanse på rett stad til rett tid, slik at ein på best mogleg vis kan agere og handle, og ikkje minst «sjå kor skoen trykkjer». Det inneber mellom anna å tilby ekstra støtte og hjelp til dei som treng det, både fagleg og sosialt, og då må me setje inn riktig kompetanse og nok ressursar.

I Kvinnherad kan ein på mange måtar seie at: «Joda, dette er me gode på», for mange skular får til mykje. Men eg meiner at vi framleis har ein veg å gå før vi kan slå oss til ro med at dette er godt nok. Me er eit samfunn i utvikling, me må følgje med i tida, og då krev det utvikling og endring.

Me må tørre å løfte opp og snakke om kva som ikkje fungerer, og vi må tørre å ta kampane og diskusjonane enten det gjeld skulestruktur, psykiske helse/«uhelse» eller mangel på pedagogisk personale i skulane og barnehagane våre. Skal me lukkast i nå dette målet har me alle ein jobb å gjere, me må stå saman, me må samarbeide, me må framsnakke og ikkje minst tørre å snakke om og ikkje rundt. Me er avhengige av kvarandre, og me må gjere kvarandre gode!

For det er slik når det kjem til oppvekst, utdanning og psykisk helse at det påverkar oss og er ein del av kvardagen vår, og for nokre er det kvardagen, på godt eller vondt, og då må me vere rigga, å stå klare til å hjelpe og agere raskt.

Me har alle har ei psykisk helse om ein er ung eller gamal, i psykisk ubalanse eller ei, og det må me erkjenne og det må me snakke om. Ei sterk og berekraftig framtid byggjer på eit samfunn der ingen blir utelatne og der psykisk helse blir ivaretatt, og sjølvsagt i tråd med føringar for oppvekst og utdanning som fører til tryggleik og meistring.

Vel ein politikk som fremjar dette, vel Senterpartiet!

Godt val!

Julie Holmedal Askeland

3.kandidat Kvinnherad SP