Måtte bryta seg inn for å rykka ut

Då lyn- og torevêret kom seglande inn over store delar av Kvinnherad sundag ettermiddag, og fleire brannstasjonar kringom kommunen fekk det travelt, fekk brannstasjonen på Halsnøy eit uventa problem.

Grunna dei same vêrforholda der som i resten av kommunen, opplevde Halsnøy Brannstasjon straumbrot. Dette førte til ein svikt i systemet slik at brannmannskapet ikkje kom seg inn i bygningen.

Innbrot

– For å koma inn i bygget har dei eit system der dei bruker tilgangskort, men det skjedde ein feil med dette systemet som gjorde at dei ikkje fekk opp døra og dermed ikkje kom seg inn, fortel avdelingsleiar og varabrannsjef Øyvind Ousdal.

Dermed såg brannmannskapet seg nøydde til å ta seg inn i bygningen på anna vis, og ved hjelp at gode naboar fekk dei til slutt brote seg inn gjennom eit vindauge.

– Dei skal sjølvsagt sleppa å måtta bruka slegga for å koma seg inn på brannstasjonen, småler Ousdal.

– Etterpå kontakta dei leverandøren som igjen heiv seg rundt for å fiksa problemet. I mellomtida fekk dei lagt ut ein vanleg nøkkel, slik at dei kom seg inn, fortel han vidare.

Vidare forklarer han at garasjeportane går på ei litt anna system, der ein enkelt kan kople dei av straumen og opne dei manuelt. Innanfrå vel og merke.

– Er det noko fare for at dette kan skje igjen?

– Nei, ingen fare for det, konstaterer Ousdal.