Stor skogbrannfare – Innfører totalforbod mot open eld

Kvinnherad brann og redning innfører totalforbod mot å gjera opp eld utandørs frå og med onsdag 14. juni 2023.

– Skogbrannfaren er no stor i Kvinnherad og elles på vestlandet, og ser ut til å verta større i dagane som kjem. Forbodet gjeld førebels fram til 30. juni 2023. Brannsjefen vil då ta ein ny vurdering om det er naudsynt å forlenga totalforbodet, melder Kvinnherad brann og redning onsdag kveld.

Totalforbodet inneber at det er ikkje lov å gjera opp eld:

• i og i nærleiken av utmark og innmark

• på tilrettelagte grill- og bålplassar i eller i nærleik av skog og utmark

Forbod i utmark og innmark

Under eit totalforbod er det ikkje lov å brenne bål, nytta grill, stormkjøkken, andre kokeapparat, bålpanner og anna brenning med fast brensel som ved, kull, briketter, gras, greiner og liknande. Dette gjeld i skog og annan utmark, eller så nær at eld lett kan spreia seg vidare i terreng, samt innmarksområder.

Innmark er dyrka mark, engslått og kulturbeite, medan utmark er det meste av skog, strand, fjell, eng, myr, vatn og annan type landskap

Skuler og barnehagar

– Brannvesenet mottar mange spørsmål frå skular og barnehagar som ynskjer å tenna bål eller bruke grill på tur. No når det er totalforbod oppmodar me til å finna andre løysingar for å kose seg med mat ute, skriv vakthavande brannsjef Thomas Hallquist i meldinga.

Kvinnherad brann og redning presiserer at det framleis er lov å grilla i opparbeida hage, skulegard og større asfaltert område.

– Hugs at du alltid er ansvarleg når du gjer opp eld, uansett kor du er og når på året det er. Me ber også verksemder som driv med til dømes skogdrift, linjearbeid kraft og tele, kantklypping av vegnettet, og liknande om å vurdere og etablera tiltak for å redusere risiko for brann, sluttar vakthavande brannsjef i omtalen av totalforbodet, som gjeld for Kvinnherad kommune.