BT: Politiet fann undervasskuter etter kokainsmuglinga

Bergens Tidende har kjelder på at politiet fann undervasskuter i samband med kokainbeslaget på Husnes. Alle seks i saka er varetektsfengsla i fire nye veker.

Det er no gått over fem veker sidan politiet i ein aksjon på Husnes, nærare bestemt på Langgåt, fann i overkant av 100 kilo kokain som var smugla under vasslinja til frakteskipet «Nordloire».

Tolletaten var svært nøgde med både beslaget og innsatsen til eigen etat i samband med aksjonen, men det er ikkje sagt for mykje om kva anna som vart funne i samband med aksjonen.

Dykkarutstyr har tidlegare vore blant det omtala, men Bergens Tidende skriv at det også er beslaglagt ein undervasskuter i samband med aksjonen. Denne er truleg brukt til å frakta dykkarar til og frå båten, samt kokainen tilbake. Frå kaien på Langgåt der politiet slo til, til kaien til Hydro Husnes er det om lag 1,5 kilometer.

12. mai vart alle dei seks sikta i smuglingssaka varetektsfengsla for fire nye veker. Frykt for øydelegging av bevis og at dei sikta skal flykta frå landet har vore hovudargumentasjonen for å forlengja varetektsfengslinga.

Fire av dei varetektsfengsla nektar straffskuld, i følgje deira respektive forsvarar, medan advokatane til dei to siste ikkje vil svara på spørsmål om straffskuld. I følgje BT er den arresterte kvinna 32 år, medan mennene er høvesvis 25, 26, 29, 45 og 47 år.