Arenaopning for tusen

Ordførar Hilde Enstad kunne torsdag opna Kvinnherad Arena for over tusen nyfikne publikummarar.

Tribunane var rulla ut, og fylde opp. Utanfor Kvinnherad Arena sytte Husnes Musikklag for at hornmusikken var på plass. Inne på den enorme speleflata stod eit lite podium der Elise Bay skulle syta for at popmusikken kom på plass.

I mellom musikkinnslaga fekk ordførar Hilde Enstad æra av å stå for sjølv opninga. Ho tok publikum med på ei kjapp reise gjennom ulike milepålar for Kvinnherad Arena, før ho stod for sjølve snorklyppet.

Til å halda snora fekk ordføraren hjelp av kommunedirektør Gunn Foss og styreleiar i Sparebank1-stiftinga Kvinnherad Jan Magnus Aasen, som representerte dei to største bidragsytarane til hallen – saman med spelemiddelordninga.

Elsie Bay fekk deretter podiet til seg sjølv, og framførte begge Melodi Grand Prix-låtane sine, «Death of us» og «Love you in a dream». Etterpå var det fritt fram for dei frammøtte til å kikka seg om i heile arenaen, og ikkje minst prøva det som prøvast kunne.

Dagleg leiar i Kvinnherad Arena Daidalos Dahle inntok ei svært tilbakehalden rolle denne dagen, og var ikkje i rampelyset i det heile. Men han var i hallen heile tida, og storleg nøgd med opningsdagen.

– Det blei veldig kjekt. Me bikka 1000 publikummarar, det er eg trygg på. Det er ei god øving å få gjort. Flaskehalsane kom der me føresåg at dei ville koma. Det såg ut som at folk hadde det bra, og eg har fått enormt mange positive tilbakemeldingar, fortel Dahle.

Han er lynsnar med å påpeika at det er andre enn han som skal ha æra for storstova som no er opna.

– Det er ikkje eg som har bygd bygget eller har gjort det politiske og økonomiske arbeidet. Snorklyppet er startsignalet mitt, det er no mitt arbeid startar, legg han til.

Ungdommar og vaksne frå volleyball, handball og turn såg alle husvarme ut allereie.

– Dei og skulane har fått testa bygget litt i forkant, og det har vore heilt naudsynt på å få justert. No vart me relativt godt førebudde før opninga, og framover er det fullt køyr. Me har jobba mykje me som er på bygget, men arbeidsgleda har vore større enn arbeidsmengda. Det flaut mjukt under opninga. Lyden av hyl og glede frå barna er god bensin for oss som er her, meiner han.

Dahle er også veldig glad for å sjå ansikt frå heile Kvinnherad på plass under opninga.

– Det er viktig å få fram at det er heile kommunen sitt bygg. At me fekk Elsie Bay til å vera med på opninga, kjennest også heilt rett. Ho er ei ganske idrettsglad jente og kjempeflink songar, sluttar han.