Ber om informasjon etter sørperaset ved Kroka

Kommunen ber i eit brev til fylkeskommunen om meir informasjon om snø- og jordmassane som vart køyrd vekk etter raset som gjekk ved Kroka for to veker sidan.

Konsulent for miljøretta helsevern Synneve Skei skriv i brevet at kommunen har vore på synfaring ved det midlertidige massedeponiet på Seimsfoss, og ber så om meir utfyllande informasjon om kva metodar som vart brukte for å unngå forureining då massane vart sortert og silt. I tillegg ynskjer kommunen å få veta namnet på det godkjende deponiet for spesialavfall som vart nytta.