– No er det opp til bygda!

Tysdag kveld var innbyggjarane inviterte til ei orientering om det nye LivOGLyst-prosjektet i Uskedalen. Det kom tydeleg fram at det er mange kreative og engasjerte sjeler i bygda.

I fjor haust sendte Uskedal Utvikling inn søknad til fylkeskommunen om eit såkalla LivOGLyst-prosjekt med tittelen «Møteplass». Søknaden vart løna med 80.000 kroner til oppstart. Meininga med LivOGLyst er å skapa trivsel og vekst i lokalsamfunna, og med «Møteplass» ynskjer Uskedal Utvikling særleg å iverksetja tiltak for å halda på ungdomen og hindra fråflytting.

Formelt er «Møteplass» eit samarbeid mellom Uskedal Utvikling, Kvinnherad kommune og Vestland fylkeskommune. Etter fleire møte i styringsgruppa, var det tysdag klart for det fyrste folkemøtet. Leiarane i styringsgruppa, Kari Bråtun og Hanna Kjærland, ynska velkomen.

– Dette er eit veldig spennande prosjekt, slo sistnemnde fast.

Zip-line

Gunn Mari Moberg frå Uskedal Utvikling avslørte at det var Steinar Haugland som lanserte ideen om å søkja, inspirert av kva dei har gjort i Øystese. Han hadde også skrive søknaden.

– Viss vi klarar å få til noko, så kan vi søkja om eit 3-årig prosjekt, men det krev litt engasjement. Dette er eit prosjekt som skal engasjera heile bygda. Kva er det vi har lyst å ha i Uskedalen for å gjera det kjekkare å bu her? Er det meir aktivitetar og fleire møteplassar? spurde Moberg.

Sjølv om 30 frammøtte nok var ein smule skuffande, er det trass alt viktigare at dei som er der har noko å bidra med. Organisasjonane som var til stades kunne alle fortelja om spennande idear og planar. Audun Eik representerte Uskedal Friluftslag, som har ansvaret for Stemneplassen og området rundt.

– Akkurat no driv vi og avsluttar den nye turstien. Vi har elles snakka om zip-line og ei klatrerute i berget der. No har vi dessutan søkt om midlar til utviding av parkeringsplassen og eit rekkverk langs vegen, sa han.

Vasstrampoline

Thor Inge Døssland frå Uskedal Musikklag var naturleg nok oppteken av musikktilbodet. Han hadde eit råd til yngre musikantar i bygda.

– Dei som vil noko med musikken har to moglegheiter. Enten kan dei unge etablera ei undergruppe i musikklaget i staden for å sitja med oss gamlingar, for vi har nok forskjellig musikksmak. Det andre er at dei kan spela med andre korps, til dømes Rosendal, analyserte han.

– Eg håpar verkeleg at vi skal få eit godt tilbod innan musikk til ungdomane i Uskedalen, la han til.

Remi Onarheim er leiar for Uskedal Utvikling. Det er ein paraplyorganisasjon for det som skjer i bygda. Selskapet har også undergrupper som Kafé Tiaren og dugnadsgjengen.

– Det siste vi har søkt om er ei vasstrampoline, røpa han.

Per Korsvold heldt innlegg på vegner av det 290 medlemmer store Uskedal Idrettslag og Aktivitetshallen. For å utvikla tilbodet i hallen nemnde han idear som barnekino og ungdomsklubb. Kanskje vil idrettslaget også starta ei E-sport-gruppe.

Klatrehallen

Som kjent er ein stor klatrehall under planlegging, og den vert eit påbygg til Aktivitetshallen. Steinar Haugland orienterte om status.

– Vi er no i avslutninga med reguleringsplanen, og vonar å ha den klar rett over påske. Deretter vert det fokus på bygging, men utfordringa er å få inn nok kroner til byggjesøknad og prosjektering, informerte han.

Haugland la ikkje skjul på at prosessen tek tid.

– Vi var nesten ferdige med planen, men så gjekk raset på Gjerdrum. Dermed kom det krav om grunnundersøkingar, noko som kosta 200.000 kroner, sukka han.

Det er elles kome innspel om større styrkerom, møteplass, musikkrom, bandøvingslokale og spinning, i tillegg til klatring, i påbygget.

– Vi trur dette kan bli steikande bra, understreka Steinar Haugland.

Styringsgruppa avslutta med å be innbyggjarane koma med innspel om kva dei ynskjer å ha i bygda. Om tre månader vil dei gå gjennom forslaga og ta prosessen vidare.

– No er det opp til bygda! slo Kari Bråtun fast.