Får 150.000 til å lysa opp gangfelt
Trafikktryggingsutvalet til Vestland fylke har løyvd 150.000 kroner til å betra lysforholda rundt tre gangfelt i Kvinnherad.
Pengane er løyvd til å lysa opp gangfelt på strekninga mellom banken i Rosendal til Malmanger skule.
– Desse pengane dekker om lag halve kostnaden me har på utbetringa, fortel ordførar Hilde Enstad i samband med løyvinga.
Artikkelen held fram under annonsen.
Kvinnherad kommune hadde søkt om fire ulike tiltak, men fekk altså støtte til eitt i år.
– I fjor fekk me støtte til tre. Eg ser at fylket har mottatt 69 søknader om støtte, og har løyvd til 29 av dei, oppsummerer Enstad.
Søknadssummen er på om lag 29 millionar kroner, medan tilskotsramma er på 9,3 millionar kroner.
– Alle tiltaka det er søkt om har vore gjennom ei fagleg vurdering, som mellom anna har sett på risiko, betyding for trafikktryggleiken og kost/nytte. Fleire gode tiltak har ikkje nådd opp i fylkesdirektøren sitt forslag til vedtak. Tiltaka i forslaget rettar seg i hovudsak mot mjuke trafikantar og utforkøyringsulykker, skriv avdelingsdirektør for infrastruktur og veg Dina Lefdal i samband med tildelinga frå Vestland fylke.