LHL driv godt

Lagslivet er tilbake i sitt vanlege gjenge. 2022 var eit godt år prega av stor aktivitet i LHL Kvinnherad.

På årsmøtet møtte det fram over 60 av om lag 250 medlemer. Laget driv omfattande aktivitetar for medlemene; trim på land og i varmebassenget på Husnes, dans, arbeidsstove og medlemsmøte ein gong i månaden med mat og program til underhaldning og folkeopplysning. Medlemsmøta er godt besøkte og er ein viktig sosial møteplass.

Eit høgdepunkt er den årlege medlemsturen. I fjor gjekk medlemsturen til Mandal i mai. Turen varte i tre dagar med overnatting på hotell. På programmet stod utfart til Lindesnes fyr og andre turmål på Sørlandet. I haust arrangerte laget òg dagstur med buss til Bekkjarvik. I år blir det busstur til Nordfjord.

I april heldt fysioterapeut Knut Alvheim foredrag på medlemsmøtet om korleis daglege gjeremål i heimen kan vera god kroppstrening. Ein representant for Kvinnherad bibliotek har besøkt eit medlemsmøte og fortalt om kva biblioteket tilbyr publikum. Det er meir enn bokutlån.

Årsmøtet vedtok at laget i hovudsak vil halda fram med aktivitetane som før. Styret har hatt åtte møte, alle i Golfhuset på Husnes.

Randi Knutsen er leiar for dansekveldane i Kulturhuset på Husnes. I første halvår var det med i gjennomsnitt 27 deltakarar, i 2. halvår var 33 dansarar med.

På TrimX var det med 206 personar i første halvår, og 118 i 2. halvår. På tysdagsturane var det med 379 personar i vårhalvåret på 23 turar. I hausthalvåret var det 16 turar med til saman 239 deltakarar. I bassenget var 320 med på 27 badedagar i alt. På rusleturane var det med 155 personar. Det har vore godt frammøte på aktivitetane.

Olav Johnsen har vore instruktør i bassenget i 17 år. Han har runda 80 år og ønskjer avløysing. Laget ser etter nokon til å ta over og vonar at nokon vil ta arbeidet på seg.

Johnsen og dei som gjekk ut av styret fekk blomar på årsmøtet og takk for innsatsen.

I oktober var det LHL i Kvinnherad sin tur til å arrangera Sunnhordlandstreffet for medlemer i kommunane Etne, Kvinnherad, Stord og Bømlo. Det kom om lag 100 personar. Programmet var godt og vart vel gjennomført. Leif Thuland viste ein fotografisk presentasjon av aktivitetane i laget i Kvinnherad. Ei dansegruppe frå Kulturskulen stod for underhaldninga.

Det er få andre lag i Kvinnherad som har så omfattande aktivitetstilbod til menneske som har få andre tilbod og som treng ein dytt for å koma seg ut og treffa andre menneske.

Laget har god økonomi.

Etter årsmøtet 2023 er desse med i styret i LHL Kvinnherad:

Leiar: Grethe Brundtland, nestleiar: Ingunn Sandvik, skrivar: Sjur Tjelmeland, kasserar: Willy Olufsen, styremedlem Karna Smith og styremedlem og likemannskontakt: Gina Owe Grindheim.

Varamedlemer til styret: Synnøve Grude, Grethe Handeland og Sissel Pedersen.