– Det byrjar å utkrystallisera seg

Prosjektleiar Morten Ask hevdar han ikkje heilt har bestemt seg for kva «arm til Bergen» han vil tilrå. Men ikkje lenge etter påske vil han senda si tilråding vidare til departementet.

Onsdag kveld vart det skipa til stort folkemøte på Varaldsøy om den såkalla «armen til Bergen», altså traseen som skal knyta Haukelivegen saman med vestlandshovudstaden. Til stades var prosjektleiaren sjølv, ingeniør Morten Ask i Statens Vegvesen. Han tok turen for å fortelja om arbeidet så langt, og i tillegg gjekk han nærare inn på dei forskjellige alternativa.

Grenda fekk ein lengre prat med han før møtet starta.

– Generelt stiller vi opp på det vi blir spurd om. Det passar bra å koma hit no i slutten av prosessen, sa han om bakgrunnen for Varaldsøy-besøket.

Motstridande

Det store spørsmålet som alle ventar i spenning på svaret til, er sjølvsagt kva trasé han og Vegvesenet vil tilrå. Men Ask påstår at dei enno ikkje har konkludert.

– Nei, ikkje heilt, men det byrjar å utkrystallisera seg, sa han hemmelegheitsfullt.

Kva tid omverda får vita svaret, er ikkje godt å seia. Vegvesenet vil truleg senda sin rapport og innstilling vidare til Samferdsledepartementet litt etter påske. Sidan rapporten skal ut på open høyring, vil innhaldet nødvendigvis bli kjent før eller seinare.

– Enten vil departementet offentleggjera innstillinga, eller dei vil be oss gjera det, forklarte Ask.

Som i alle vegsaker, spesielt på Vestlandet, er det mange meiningar om armen til Bergen.

– Det har vore stort engasjement og veldig tydelege, motstridande interesser. Men det er eigentleg berre moro. Eg trur det er kjedeleg å jobba med noko som ingen bryr seg om, smilte Morten Ask.

Ut på hausten

Folk som har delteke på møta til referansegruppa, ser ut til å tru at det no står mellom ein variant av det nordlege alternativet (Oddadalen, Jondalstunnelen, ny bru over til Tørvikbygd) eller ein variant av Sunnfast. Nyleg gjekk fylkesordførar Jon Askeland ut og nærast slo fast at det er den nordlege traseen som vil stikka av med sigeren.

– Kva tenkjer du om uttalen til Askeland?

– Han har i alle fall ikkje fått det frå oss, lo Morten Ask.

Prosjektleiaren fortel at det er tre faktorar som vert lagt til grunn når politikarane skal føreta si endelege avgjerd; resultatet av den offentlege høyringa, konsulentar si kvalitetssikring av alternativa, og Vegvesenet sin rapport.

– På bakgrunn av dette vil departementet leggja saka fram for avgjerd i regjeringa, fortel Ask.

– Når kan vedtaket der bli gjort?

– Eg trur ikkje vi får ei avgjerd frå regjeringa før ut på hausten ein gong.

Faglege vurderingar

Ask understrekar at Vegvesenet i sin rapport utelukkande vil basera seg på faglege vurderingar. Tema er mellom anna prissette og ikkje-prissette konsekvensar, måloppnåing og klima. Moglegheita for trinnvis utbygging og at deler av prosjektet kan bli skubba på i tid, ser også ut til å spela ei sentral rolle. Men mykje vil sjølvsagt handla om reisetid, tal kilometer og pris.

– Når eg legg fram anbefalinga mi, så seier eg ikkje berre «vi har valt dette alternativet». Dei fleste forstår kvifor vi vel det eine eller det andre, men dei er ikkje alltid dei er samde, opplyste Ask.

Det som etterpå skjer i departementet og i regjeringa vil dessutan handla om politikk. Også høyringsrunden kan påverka sluttresultatet. Det betyr i teorien at alle dei framlagde alternativa framleis har ein sjanse, samstundes som at dei også kan bli justerte. Til dømes finst det dei som jobbar for å flytta Sunnfast til Halsnøy.

– Ein må leita etter den løysinga som er lågast på kostnader og som medfører minst mogleg ulempe, understreka Ask.

Uhilda

Morten Ask er opphavleg frå Tønsberg, men bur i Porsgrunn, der han er bonde på fritida. Han tykkjer det er veldig greitt å ikkje vera frå nærområdet til «armen».

– Dermed er eg uhilda i prosessen. Eg synest det er ein stor fordel, for då kan eg gå over torget utan å måtta diskutera med alle eg treff. Sjølv om eg synest det er kjekt med diskusjonar, er det i alle fall greitt å sleppa det på festar, humra han.

Sjølv om veg over Varaldsøy inngår i det eine alternativet, har ikkje prosjektleiaren vore på øya før.

– Nei, men eg har tenkt under heile prosessen at eg skulle vore her, men så har det aldri blitt tid, vedgjekk han.