Opnar eksklusiv restaurant

Opplevingssenteret Salmon Eye introduserer restauranten Iris.

Restauranten, som etter planen skal opna seint våren 2023, blir lokalisert på den spektakulære flytande Salmon Eye som ligg like utanfor Rosendal. Her kjem gjestane til å bli teke med på ein eksklusiv «Expedition dining», som ikkje kan opplevast noko annan stad, kjem det fram i ei pressemelding.

Akkurat som Salmon Eye, kjem også restauranten berre til å vera tilgjengeleg med båt. Ein kveld på Iris vil vera ein ekspedisjon av ordets rette forstand, der 24 gjester per kveld kan få ei uforgløymeleg reise som inkluderer ei oppleving av fjorden med elektriske båtar, etterfylgt av ein 18-rettars middag i restauranten med panoramautsikt over fjorden, isbreane og fjella, skriv dei vidare.

Michelinkokk

Sjefskokk på den eksklusive restauranten vert Anika Madsen, som inntil nyleg jobba som sjefskokk på restauranten Fasangården i København. Madsen har også erfaring frå ei rekkje andre kjende og eksklusive restaurantar i København, blant anna Michelinrestauranten Formel B.

– Det å løfta fram dei mindre kjende ingrediensane har alltid vore mitt hjarte nært. Viss eg oppdagar ein ingrediens som vil føra til ei grønare framtid, er eg ikkje redd for å tøya grensene. Men for å overtyda folk om å lika det, må det smake verkeleg godt, seier Anika Madsen i pressemeldinga.

– Her på den norske kysten kan eg utforska eit heilt univers under overflata som eg berre kunne drøyme om i København. Denne regionen tilbyr nokre av verdas reinaste og mest spanande sjømatprodukt. Eg ser spesielt fram til å jobba med lokale ingrediensar og løfte dei opp til ei gourmetoppleving. Det er også ein overflod av regionale produkt som viltkjøt, sauemjølk og sider som vil ha naturleg plass på menyen, fortset Madsen.

Gastronomi og berekraft

Salmon Eye ynskjer med restauranten Iris å kombinera gastronomi og berekraft i ein global samanheng og bygga på lokale ingrediensar. Menyen på Iris blir som ei historie. Ei historie om utfordringane og truslane mot det globale matsystemet, men også om idear og forslag til framtidige innovasjonar som kan hjelpa oss nærmare ei løysing, skriv dei vidare.

Salmon Eye er initiert og eid av brørne Sondre og Erlend Eide gjennom Eide Fjordbruk, verdas fyrste og einaste CarbonNeutral® sertifiserte lakseprodusent.

– For å produsera nok mat til verdas veksande befolkning må me utnytta det enorme potensialet som ligg i havet. Ikkje berre når det gjeld å utvikla teknologi for meir berekraftig matproduksjon men også ved å skapa dei beste matminna som inspirerer folk til å utforska moglegheitene under overflata, skriv dei i pressemeldinga.

Vidare skriv dei at dei ynskjer å løfta verdas største utfordringar, som klimaendring og berekraftig matproduksjon.

– Dette er utfordringar som me berre kan overvinna viss alle bidrar. Regjeringar må leggja til rette for at bedrifter kan omstilla produksjonen, og forbrukarane må ha høve til å ta dei rette valga. Iris vil vera på frontlinja og verkeleg syna vår misjon på fata til gjestene, seier Sebastian Torjusen, leiar ved Salmon Eye.