Vakker vinterkonsert på Valen

For fjerde år på rad gjekk vinterkonserten av stabelen i kyrkja på Valen laurdag kveld.

Den musikkelskande familien Haugan inviterte nok ein gong til vakker musikk i kyrkja på Valen. Konferansier Hanna Haugan Solheim dediserte konserten på emosjonelt vis til mor si, som døydde for 5 år sidan.

Det var mor hennar, med sin kjærleik til nettopp slike konsertar, som inspirerte familien til å samla inn pengar til eit konsertpiano etter hennar død. Det fekk dei til, og på det viset kom denne fortryllande tradisjonen i gong.

Det var knapt eit ledig sete då det var duka for både korsong, solosong og vakre instrumentale innslag denne kvelden. Konferansier Solheim, som slett ikkje var åleine med å representera familien, losa oss trygt og stødig gjennom konserten. Søstera, Silje Haugan, opna blant anna konserten med ei soloframføring på fiolin. Også nevøen, Kristian Haugan Fossheim, tok del i konserten. Fossheim, som berre er 14 år, imponerte stort då han debuterte denne kvelden som solopianist med eit nydeleg stykke av Debussy.