34 fleire utrykkingar i 2017
Kvinnherad brann og redning hadde i fjor 137 oppdrag, det er 34 fleire enn året før.
– Størst auke hadde vi i oppdrag til first responder og trafikkulukker, skriv brannsjef Atle Josdal i ei pressemelding.
Og det er også dei to postane som utgjer høvesvis andre og fyrsteplass på oppdragslista. Talet på trafikkulukker har auka betrakteleg det siste året, og utgjorde med sine 27 oppdrag heile 20 prosent av Kvinnherad brann og redning sine oppdrag i 2017. Ser vi på tala for dei to føregåande åra var det 12 oppdrag knytt til trafikkulukker i 2016 og berre 7 i 2015.
Artikkelen held fram under annonsen.
Med 9 registrerte brann i bygningar, aukar også den posten litt samanlikna med året før. Og var også den med på å gjera 2017 til eit travelt år for Kvinnherad brann og redning.
Travlast var det for brannstasjonen på Husnes, som stod for godt over halvparten av alle oppdraga.
– Hovudbrannstasjonen vår på Husnes hadde flest utrykkingar med 72 i løpet av fjoråret. Deretter kjem Rosendal brannstasjon med 34 utrykkingar, skriv Josdal.