Kommunen tilrår å venta med «poll til poll»-tunnel – saknar framdrift for Furebergtunnelen

Kvinnherad kommune og Vestland fylkeskommune er tydelegvis ikkje samde om kva tid planlegginga av ny tunnel mellom Austrepollen og Nordrepollen skal starta. Mellom anna viser kommunen til eit krav om at Furebergtunnelen skal planleggjast samstundes.

Måndag 6. februar heldt utsendingar frå Vestland fylkeskommune oppstartmøte med Kvinnherad kommune. Temaet var detaljregulering av vegen mellom Nordrepollen og Austrepollen. Fylket stilte med fire personar, medan kommunen var representert ved Rune Helland, Anne-Lise Næs, Dag Otto Brænde, Anbjørn Høivik, Vilde Rørvik Grøtte, Kristian Helgesen, Peder Sjo Slettebø, ordførar Hilde Enstad og varaordførar Leif Sverre Enes.

Ifølgje referatet vart det slege fast at strekninga Nordrepollen-Austrepollen både er smal, har dårleg kurvatur og er svært skredutsett.

«Det er laga eit forprosjekt for å kunne detaljregulere ein ny vegtrasé – rassikringstunnel – mellom Nordrepollen og Austrepollen. Det er vurdert at det ikkje er mogleg å utbetra langs eksisterande veg, og at tunnel vert løysinga», står det.

Bør avventa

Punkt 1.7 er nok det meste interessante i referatet. Under overskrifta «Kan kommunen tilrå oppstart?» står det at «Kvinnherad kommune vurderer at ein bør avventa avklaring av E134 arm mot Bergen (KVU) før ein startar opp planarbeidet». Kommunen meiner også at fleire tema uansett bør utgreiast nærare før ein startar. Samstundes vart det vist til eit kommunestyrevedtak frå mai 2019, og ein ynskjer difor at planen skal utvidast til å omfatta vegen mellom Årsnes og Folgefonntunnelen. Der ser ein for seg to-felts veg og utbetra Furebergtunnel.

Kommunen vil vidare at det blir sett nokre rekkefølgjekrav. Ein krev at arbeidet med opprusting av-/eventuell ny Furebergtunnel, samt to-felts køyrebane mellom Årsnes og Folgefonntunnelen, skal starta seinast samstundes med oppstart av ny rassikringstunnel Nordrepollen-Austrepollen.

Ta særs lang tid

Fylkeskommunen påpeika då at dei er opptekne av å koma raskt i gang med planarbeidet for det skredbelasta området.

«Dei er redd det vil ta særs lang tid før ein får svar på KVU-spørsmålet. Fagansvarleg har allereie bestilt grunnundersøkingar, og det må uansett på plass før ein startar planarbeidet», vert det opplyst.

Kvinnherad kontra med at fylkesordføraren i førre møte om armen til Bergen sa han gjerne ser at konseptvalutgreiinga konkluderer med ei trinnvis utbygging til Bergen, via Jondal. «Fylkesordføraren grunngav dette med at fylkeskommunen i så høve ville sleppa utbygging av mellom anna «poll til poll»-tunnel. Kvinnherad kommune meinte difor at ein bør drøfta om planoppstarten «poll til poll» bør utsetjast til det ligg føre konklusjon i KVU», står det i referatet.

Fylket svarte at dei ser for seg å starta arbeidet med tunnel så snart som mogleg.

«Dersom kommunen ikkje ynskjer at ein startar dette planarbeidet no, så må det skrivast ei ny sak til fylkestinget som tar stilling til slike endringar. Dette på grunnlag av kommunen si tydelege tilbakemelding i dette oppstartsmøtet», heiter det.

Saknar framgang

Kvinnherad understreka at kommunen er positiv til at fylket vil prioritera framdrift med å skredsikra vegen mellom Nordrepollen og Austrepollen, men understreka at dei har kommunestyret sitt vedtak frå 2019 å halda seg til. Samstundes påpeika kommunen at fylket gjerne burde få saka lagt fram for kommunestyret.

«Kommunen saknar elles framgang i forprosjekt for Furebergtunnellen, jf. møtet i 2019, og stiller seg spørjande til at vi ikkje har motteke noko informasjon om dette arbeidet», vert det opplyst. Dette spørsmålet var partane samde om at truleg må tilbake til fylkestinget for ei avklaring.