Imponerande besøk på dagsturhytta i fjor

Eldsjel Helge Furdal er svært nøgd med besøkstalet på dagsturhytta i 2022.

Helge Furdal er ein av medlemmene i Kvinnherad Turlag som har teke på seg å føra tilsyn med dagsturhytta Fagnabu. Hytta vart offisielt opna i oktober. Med utgangspunkt i gjesteboka har ein no rekna ut at om lag 2.500 personar besøkte hytta i 2022.

– Det er imponerande. Folk synest det er kjempekjekt å koma opp der. Hytta passar for alle, og vi ser at blant gjestene er det både pensjonistar og foreldre som går til dagsturhytta medan ungane er i skitrekket, seier Helge Furdal.

Han meiner den gode skiløype opp til hytta er ein viktig del av suksessen.

– All ære til dei på skisenteret som køyrer løype opp til dagsturhytta, rosar Furdal.

Plasseringa ved breidda av Nautavatnet er elles ein snørik plass. Rekorden som Helge Furdal har målt er på 1,98 meter frå mars i fjor.

– Då dekka snøen nesten heile veggen, heilt opp til der hemsen og trekantvindauga byrjar, smiler han.

Rekorden når det gjeld dagsbesøk skriv seg frå litt før påske i fjor. Då stakk nærmare 100 personar innom på éin og same dag.

Stadige utbetringar

Det skjer stadig utbetringar på Fagnabu. No er det installert ny omn. I tillegg har ein laga til ein kombinasjon av tilluft frå undersida og avløp ovanfor, slik at det har blitt mykje lettare å fyra i.

– No funkar det, men det er framleis mykje igjen å gjera, seier Furdal om hytta.

Han avslører også at batteriet til solcelleanlegget rauk tidleg, då det viste seg at det ikkje tolte kulde. Erstatning vart påspandert av Bjarte Naterstad.

– Så no er det ljos i hytta igjen, og batteriet toler faktisk kuldegrader, humrar tilsynsmannen, som sjølv har vore der oppe og jobba eit utal gonger. Faktisk vågar han ikkje seia kor mange turar det dreiar seg om i alt.

– Hytta krev litt tilsyn, seier han smålåtent.

Dassturhytta

Men han har ei oppmoding til brukarane. Den dreiar seg om utedassen, som har fått det fengande namnet Dassturhytta.

– Det er litt utfordrande å få folk til å bruka toalettet på rett måte. Eg oppmodar difor alle om å følgja instruksjonane som er hengt opp. Ei slik hytte og utedassen er avhengig av at alle er med og held det vedlike, understrekar Helge Furdal.