Bjørn Moe lanserer debutalbumet

Den erfarne trommisen Bjørn Moe, busett i Uskedalen, er no klar med sitt debutalbum som låtskrivar og vokalist.

Etter å ha «gøymt seg» bak trommene i nesten 40 år, kjem Bjørn Moe med debutalbumet «Angel Number Seven» den 10. februar.

«I september 2021 slapp han sin aller fyrste singel «The Book», som vart svært godt mottatt. Sidan har han gitt ut seks singlar, og har allereie trollbunde fleire med si sjelfulle og kraftige stemme. No kjem debutalbumet med ti låtar, der han også viser at han er ein habil låtskrivar», heiter det i ei pressemelding.

Rytmelandskap

På plata hentar han inspirasjon frå heile verdas rytmelandskap, og tek like gjerne ein tur til Afrika som til Midtausten eller Karibia. Til dømes er tittelsporet skrive i 7/8 takt, noko som er eit litt uvanleg val for ein poplåt.

«Det fascinerande er at desse rytmiske krumspringa er utført så elegant og saumlaust, at lyttaren nesten ikkje legg merke til det, men rett og slett berre blir drege med inn i låta. Desse litt finurlege rytmiske grepa i låtskrivinga, gir både tittelsporet og debutalbumet ein distinkt karakter og ein personleg signatur», står det vidare.

Eventyrlyst

Tematikken på plata er kjærleik, familieband og røter, i tillegg til ei historie om eventyrlyst og sjølvutvikling.

«Bjørn Moe leverer ti godt gjennomarbeida låtar, sydd saman av tittelen på albumet, «Angel Number Seven». Det er ikkje flust av trommeslagarar som også er vokalistar, og som skriv både musikken og tekstane sine sjølv. Bjørn Moe gjer det, og dette debutalbumet er vel verdt å bruka 41 minuttar på å spela gjennom», lokkar pressemeldinga.

Bjørn Moe er født og oppvaksen i Odda, men har levd mesteparten av sitt musikalske liv i Bergen. Han er no busett i Uskedalen. Albumet er spelt inn i Demningen Studio på Sotra, med Eirik Grønner som produsent. Grønner har tidlegare jobba med storleikar som Kurt Nilsen, Tor Endresen, Odd Nordstoga og Marion Ravn.