Kjekt på dugnad

Mange stilte opp for å gjera ein innsats for å halda kyrkjegarden i Rosendal i god stand.

– Vi skal mala gjerdet ved Kvinnherad kyrkje og håpar på hjelp frå deg.

Det skreiv Kvinnherad sokneråd i annonsen på førehand. Om det var dugnadsanda eller dei lova forfriskingane som gjorde utslaget, veit vi ikkje, men bønna vart i alle fall oppfylt. Kring 15 personar møtte nemleg fram onsdag ettermiddag, og dei gjorde ein imponerande innsats med å gje det brune gjerdet rundt og inne på gravplassen eit naudsynt strøk med malekosten.

– Svært bra frammøte, konstaterte Solfrid Hellesøy Siqveland, som sjølv sit i soknerådet.

Det gjer også Gunn Berit Sandnes Fosse.

– Det er veldig, veldig kjekt med slik dugnad, og så blir det jo svært fint etterpå, smilte ho.