Etterlyser tiltakspakke på 6 mill.

I desember 2015 vedtok kommunestyret å setja av 6 millionar kroner til utvikling av bustadfelt dei neste åra. Øyvind Utne (H) reagerer sterkt på at rådmannen enno ikkje har fremja sak om bruken av midlane.

Det var i den nye fleirtalsgrupperinga sin fyrste økonomiplan at kommunestyret sette av 1,5 millionar kroner til «Tilrettelegging bustadfelt, planlegging, grunnkjøp m.m.» kvart av åra 2016-2019. Bakgrunnen var at dei såg korleis folketalstendensen i kommunen er, og dei ynskte difor å få fart i bygginga av nye bustadfelt i alle bygder.

– Vi ser at det er veldig kostbart å driva feltutvikling i Kvinnherad. Skal vi få realisert fleire av dei prosjekta som finst, er det viktig at kommunen går inn med midlar. Utbyggjarane må ofte halda mykje pengar i felta, og det kan ta tid å få selt alle tomtene. Når då styresmaktene kjem med pålegg om alt frå fjerning av høgspentlinjer og arkeologiske utgravingar til bygging av fortau og gang- og sykkelvegar, kan det bli så kostbart at det ikkje er økonomisk forsvarleg å setja i gang, seier Øyvind Utne om vedtaket frå 2015.

 

Motlaust

Seinare har han purra administrasjonen fleire gonger for å få framdrift i saka. I oktober i fjor sendte han til og med inn forslag til retningslinjer for bruken av midlane, slik at det skulle gå radig å få saka opp til politisk handsaming.

– No er vi i 2017 og enno er ikkje noko klart. Å produsera retningslinjene burde vore gjort på ein halvtime. Eg forstår ikkje kvifor det skal ta så vanvitig lang tid. Det er slike ting som kan gjera det motlaust å vera lokalpolitikar, sukkar Utne.

Som medlem i kommunestyret, forvaltningskomiteen og kommuneplannemnda er han spesielt oppteken av å få realisert flest mogleg bustadfelt. Dessutan vil han at kommunen generelt skal ha ei JA-haldning. Det er slike saker som gjorde at han tok attval til politikken.

– Eg ynskjer å bidra til at folk skal få sjansen til å busetja seg på landsbygda og byggja seg eit naust ved fjorden. Men i arbeidet med den nye arealplanen opplever vi at regionale styresmakter ikkje klarte å halda høyringsfristen, som var 15. desember. Dei ringde då inn til kommunen, varsla motsegn og bad om forlenga frist. Byråkratiet tek dermed til seg makt heilt på sida av opne, politiske prosessar, meiner Utne.

 

Konkrete døme

Høgre-politikaren vedgår at han tykkjer folketalsutviklinga er svært urovekkjande. I tillegg til å jobba for fleire arbeidsplassar, meiner han feltutviklingsmidlane er viktige for å snu trenden. Konkret føreslår han at pengane vert nytta ved at kommunen betalar deler av rekkefølgjekrava som fleire bustadfelt er hefta med. Han fortel at det finst mange gode tiltak som kunne fått slik støtte, og nemner tre døme:

* Etablering av eit lite felt i Austrepollen, der brakkeriggen til Jondalstunnelen stod.

* Neslia Øvre i Rosendal, som har krav om gang- og sykkelveg.

* Kringleneset på Sandvoll, der det også er rekkefølgjekrav.

 

Lovar sak i vår

Fungerande avdelingsleiar for både Forvaltning og Næring og samfunnsutvikling i Kvinnherad kommune, Tormod Fossheim, opplyser at administrasjonen har diskutert saka om feltutviklingsmidlane.

– Vi har drøfta om desse midlane skal inngå som ein del av den kommunale bustadpakken, men har ikkje teke noko endeleg avgjerd om korleis vi meiner pengane skal disponerast. Det ligg ikkje klare føringar om dette i kommunestyret sitt vedtak, seier Fossheim til Grenda.

– Når kan saka koma til politikarane?

– Vi har det på papiret, og må greia få saka klar i løpet av våren, heilt sikkert.

Fossheim understrekar at dei 1,5 millionane kronene som står i økonomiplanen for 2016 ikkje er tapte, sjølv om dei ikkje er brukte enno.