Adventstur 11. desember: Fagnabu

Søndag 11.desember går turen til dagsturhytta Fagnabu ved Nautavatnet.

Frå FV5024 følgjer du skilting til skisenteret i Fjellhaugen. Ved nedste parkeringsplass på Bjørkestølen er det god plass til parkering, her har vi oppmøte og avmarsj kl 12.00.

Først følgjer vi ein grusveg ca 300 m og tek deretter til høgre på ein tursti/traktoveg vel 700 meter oppover i dalen. Dalen opnar seg i stikrysset, kor sommarruta går mot venstre: Stien følgjer elva på høgre hand. I starten eit delvis klopplagt våtmarksprega parti, og kryssing av ein bekk, deretter meir fast grunn og tørr sti. Stien er periodevis tydeleg og følgjer i hovudsak elva. Stien kryssar elva over ei bru som ikkje er merka av på kartet. Frå brua er det om lag 250 meter i søraustleg retning opp til Nautavatnet. Både sommar- og vinterruta er skilta.

Oppe ved Nautavatnet har Kvinnherad kommune sett opp dagsturhytta «Fagnabu», som er open for alle. I hytta er det vedomn og ein fin stad å ta ein rast. Eit lite minibibliotek er det også. Ved siden av hytta er det sett opp eigen utedo som også er open for alle. Hytta og utedoen vert drifta på dugnad av Kvinnherad turlag.

Turleiarar Helge Furdal og Grete Solheim