Kunnskapsministeren kjem til Hatlestrand

Tysdag får Hatlestrand skule besøk av kunnskapsminister Tonje Brenna. Ho skal då bli nærare kjent med heildagsskulen.

Kvinnherad har hatt fleire statsrådbesøk dei siste par åra, spesielt frå Senterpartiet. Men no kjem også ein Arbeidarparti-statsråd til kommunen.

– Eg sendte invitasjon til Kunnskapsdepartementet i oktober, og fekk då tilbakemelding om at det kunne høva på nyåret. Men no har dei snudd seg rundt, og funne ut at dei kan koma før jul. Det er veldig kjekt at dei kjem når vi inviterer, fortel ordførar Hilde Enstad (Ap).

Kunnskapsminister Tonje Brenna skal tysdag vera på Hatlestrand skule i vel éin time, i samband med ei reise mellom Haugesund og Bergen. Då skal ho få studera heildagsskulen på nært hald.

– No når statsbudsjettet er i hamn, kan dei byrja å arbeida med andre ting. Då er det klart dei må koma og sjå vårt unike pilotprosjekt på Hatlestrand, som vi er så stolte over, seier Enstad.