Vedtok stramt budsjett – må sjå på strukturelle grep

I forslaget til statsbudsjett er ikkje løns- og prisstigning i 2022 kompensert. Dette gjev store utfordringar for Helse Fonna.

Fredag hadde Helse Fonna styremøte. Der vart mellom anna neste års budsjett handsama.

«Løns- og prisvekst inneverande år er ikkje kompensert, noko som vil utgjera eit nedtrekk på om lag 100 millionar kroner berre for Helse Fonna. Dette er ikkje innarbeidd i budsjett, utfordringsbilete eller risiko. Eit slikt nedtrekk vil føra til at administrerande direktør, i dialog med organisasjonen, eigar og styre, må sjå på ytterlegare kraftige tiltak, som til dømes strukturelle tiltak, endra tenestetilbod, endring av opptaksområde, endring av vaktordningar og liknande», stod det i administrasjonen sitt framlegg til budsjett.

Det vert vidare slege fast at det i takt med aukande oppgåvemengde og utfordringar i drifta, er det stadig meir krevjande å få rammer og inntekter til å strekkja til. Det vil difor verta naudsynt å gjennomføra kostnadsreduserande tiltak. Styret vedtok budsjettforslaget, som har ei ramme på 4,073 milliardar kroner.

Situasjonen er alvorleg

På fredagens møte uttrykte fleire av styremedlemmene bekymring for situasjonen. Styreleiar Petter Steen jr. oppsummerte det slik:

– Realiteten er at det er ein dramatisk situasjon for spesialisthelsetenesta i heile landet, ikkje berre Helse Fonna. Vi må ikkje koma i ein situasjonen der vi er tomme for likviditet. Situasjonen er alvorleg, og no er tida inne for å sjå på strukturelle grep. Det betyr ikkje at vi skal leggja ned lokalsjukehus, men vi må sjå på samhandling mellom sjukehusa. Kven gjer kva, og kor mykje dobbeltarbeid gjer vi? Eg trur det går an å ha ein ryddig og klok prosess på dette, i nært samarbeid med lokalsamfunna, sa han ifølgje ei pressemelding.

Rapporten for oktober viser elles at helseføretaket framleis er ein jobb å gjera før det kjem i økonomisk balanse, og ventelistene er framleis lange.