Skal driva fotballakademi i Dubai

Lars Johan Myklebust er på flyttefot til Dubai. Der skal han vera med og driva eit fotballakademi med opp mot 1.500 elevar.

Akademiet ligg i bydelen Dubai Sports City, og Myklebust (36) flyttar ned i august for å ta til med arbeidet.

– Elevane er i utgangspunktet frå seks til 17 år, og ein kjem til å ha mellom 800 og 1.500 elevar ved akademiet, fortel Myklebust på telefon frå Sandnes.

I februar tok han til som utviklingssjef for OBOS-ligaklubben, men før eit halvt år er gått har han blitt lokka til jobbskifte. Kontrakten vil halda han i byen ved Den persiske golfen i minst tre år. Stillingsinstruksen blir røft sagt å driva og drifta akademiet.

– Eg har vore for kort tid her i Sandnes Ulf og har for mykje ugjort. Difor sa eg eigentleg nei då tilbodet kom, men totalpakken blei for god til at eg kunne seia nei, forklarer han.

I Dubai blir han på ny kollega med Johnny Mikael Gallefoss, som han jobba saman med i to år i Belgia. Myklebust flyttar ned til emiratet i Dei sameinte arabiske emirata i august.