107 omkom i trafikken i fjor

I 2017 mista 107 menneske livet på norske vegar. Det er 28 færre enn i 2016, og det er det lågaste talet på 70 år.

Det skriv Statens vegvesen i ei pressemelding måndag.

Men tala for desember stig. For i løpet av fjorårets siste månad mista tretten personar livet i trafikken, mot åtte i 2016.

– Sjølv om tendensen er at det er stadig tryggare på vegane, er dette langt meir enn tal og statistikk. Bak kvar einaste ulukke er det ein tragedie som rammar familie, vener, kollegaer og lokalsamfunn, seier vegdirektør Terje Moe Gustavsen i ei pressemelding.

 

Flest i Hordaland

Med sine 12 dødsulukker i 2017 er det Hordaland som kjem verst ut på statistikken. Tett følgd av Akershus (11), Rogaland (9) og Oppland (8). Aust-Agder (2) og Finnmark (2) har færrast.

– Årsakene til dødsulukkene er fleire og samansette. Men eit markant trekk i 2017 er ein overrepresentasjon av godt vaksne menn med for stor fart som mister livet i møte- og utforkøyringsulukker, seier Gustavsen.

Vegvesenet sine førebelse tal viser at 76 menn og 31 kvinner omkom i trafikken i 2017. Over halvparten av desse er menn over 45 år.

 

– Få ned farten

Vegdirektøren er oppteken av at fleire må halda fartsgrensa og køyra etter forholda for at vi skal unngå at folk blir drepen eller hardt skadde i trafikken.

– Framleis blir fleire hundre menneske drepen eller skadd for livet i trafikken. Vidare nedgang kjem ikkje av seg sjølv. Vi skal gjera vårt for at det skal bli færre som skal oppleva å mista nokon eller bli alvorleg skadd i trafikken. Om vi lukkast med å få farten ned vil mange av desse dødsulukkene vera forhindra. Det betyr liv, mange liv. Her må kvar og ein av oss som ferdast på vegane ta sin del av ansvaret, seier Gustavsen.

 

Trafikkdrepne 2017

Desember 2017  13

Desember 2016    8

2017      107

2016      135

2015      117

2014      147

2013      187