Den fødde komikar kjem til Husnes

Det er ein relativt kortreist komikar som vitjar Kvinnherad laurdag 29. oktober. Då kjem nemleg Stavanger sin store humorson Hans Morten Hansen.

Hansen har lang fartstid i humorens namn, og blir omtala som «ein av landets mest rutinerte og bejubla standupkomikarar». No kjem han til Husnes for å mora innbyggjarane i Kvinnherad med solo-showet sitt «Natural Born Komiker».

I løpet av karrieren har han mellom anna motteke Komiprisen for Beste standup to gongar, og sett verdsrekord i lengst standupshow. I 2010 serverte han nemleg eit 38 timar og 14 minuttar lang førestilling på Latter på Aker Brygge.

Hansen har også hatt stor suksess med show som «Is this it?» og «50 Shades of Hansen», og mange har truleg blitt godt kjend med karakteren Gullestad gjennom fleire sesongar med «Side om side».

I førehandsomtalen av showet han kjem til Husnes med kan ein lesa følgjande:

«Det er liten tvil om at Hans Morten er morosam. Det er noko med måten han seier det på. Og kva han seier. Og korleis han ser ut når han seier det. Men korleis blei han ein av landets beste komikarar? Var han fødd morosam? Er det arv eller miljø? Skal vi takka Hansen-slekta eller skuldast det oppveksten, byturane, ungane, ekteskapa eller naboane?»

Arrangøren lovar ei heilaftans forestilling med den fødde komikaren Hans Morten Hansen.