Mammografibussen kjem

Under koronaen uteblei tilbodet med mammografibussen. Kreftsjukepleiar Marit Sjøvangen har difor purra for å få tilbodet i gong att, og no kjem den.

I oversikta til Mammografiprogrammet står det at Kvinnherad får bussen på besøk våren 2023. Dette stemmer såleis ikkje, for den dukkar opp allereie i november.

Om det er purringa frå Marit Sjøvangen som har fått framskunda besøket er ukjend, men 28. november parkerer iallfall mammografibussen utanføre Rosendal Samfunnshus igjen, etter fleire år der dei innkalla kvinnene har måtta reisa til Bergen eller Haugesund for mammografiscreening.

– Mammografibussen blir ståande til 19. januar 2023, men besøket blir mogleg utvida med ei veke til etter det, forklarar Sjøvangen.

Tidleg oppdaging kan redda liv

Ho er tydeleg glad for at tilbodet for Kvinnherad-kvinnene rullar i gong att, då det er fleire som har lete vera å sjekka brystene i screening under koronapandemien, sidan dei har måtta reisa ut av kommunen for å gjera dette.

Sjøvangen minnar elles om Rosa Sløyfe-marsjen som blir arrangert i Rosendal neste fredag. Tema for årets aksjon er Tidleg oppdaging, noko mammografiscreening kan bidra til.

– Jo før brystkreft blir oppdaga, jo betre blir prognosen og behandlinga meir skånsam, opplyser styreleiar i Brystkreftforeningen, Ellen Harris Utne i samband med Rosa Sløyfe-aksjonen 2022.

Inntektene frå aksjonen, som starta opp i 1999, går til forsking på brystkreft slik at fleire kan overleva og at fleire får best mogleg livskvalitet etter brystkreftbehandling.