Profilera og SKAG slår seg saman
– Saman står me sterkare, seier gründerane som no blir kollegaer i SKAG Profilera AS.
Etter å ha samarbeidd tett i over eit år, vel SKAG Design og Profilera no å slå seg saman til design- og profileringsbyrået SKAG Profilera. Dette kjem fram i ei pressemelding tysdag 18. oktober.
– Me fann kjemien veldig fort då Profilera etablerte seg i fjor. Sidan har me samarbeidd om ei rekke profileringsoppdrag, både i og utanfor Sunnhordlandsregionen. Fagmiljøa våre utfyller kvarandre veldig godt, og ved å slå oss saman blir me ein endå sterkare, seier Silvia Karlsen, dagleg leiar i SKAG Design, og Åse Løkkebø, dagleg leiar i Profilera.
Artikkelen held fram under annonsen.
Profilera vart utvida i 2021 då Åse Løkkebø, Ronny Havn og Terje Tvedten kjøpte seg inn i halvparten av Metro Reklamestudio på Husnes. No veks dei vidare i samanslåinga med SKAG Design.
«SKAG Design har sidan 2016 bygd seg opp som eit lite, men sterkt lokalt reklamebyrå innan design, trykk og profilering. Selskapet blei etablert av Silvia Karlsen og Anne Grethe Skorpen Dahl, og har i dag fire tilsette i lokala på Vabakkjen på Stord», skriv det nye selskapet i pressemeldinga.
Profilera har på si side sju tilsette i avdelingar på Heiane på Stord og på Husnes i Kvinnherad.
Smeltedigel for design- og trykktenester
SKAG Profilera vil no jobba med ei samlokalisering av avdelinga på Stord, medan avdelinga på Husnes består som før.
– Det er stor aktivitet i regionen, og begge selskapa har hatt det svært travelt det siste året. Ved å bli eitt samla design- og profileringsbyrå vert me meir robuste til å takla oppdragsmengdene, styrka arbeidsplassen vår, og utvikla endå betre tenester for kundane våre, seier Løkkebø og Karlsen.
Det er Løkkebø som blir dagleg leiar i SKAG Profilera. Styreleiar i SKAG Design, Svein Hatlevik, blir òg styreleiar i det nye selskapet.
Hatlevik meiner at dette grepet vil gjera SKAG Profilera til eit endå sterkare byrå innan design og profilering i regionen, der dei blir den einaste aktøren som tilbyr design, trykk og profilering på ein stad.
– Eg har stor tru på at denne dyktige gjengen både vil begeistra marknaden og betena eksisterande og nye kundar i og utanfor regionen på aller beste vis, melder Hatlevik.