Går saman for å løfta reiselivet

For å gjera Sunnhordland meir attraktiv som reisedestinasjon går reiselivsnæringa i regionen for fyrste gong saman om ein felles merkevarestrategi for VisitSunnhordland.   

I løpet av perioden 2017 til 2020 skal næringa i dei åtte forskjellege kommunane jobba saman for å gjera det dei kallar kystperleriket Sunnhordland til ein meir attraktiv destinasjon. Med eit klart fokus på å utnytta regionen sine styrker, vil prosjektgruppa bak merkevarestrategien jobba for å gjera merkenamnet Sunnhordland sterkare, samt skapa reiselivsvekst på heilårsbasis.

For å få dette fram hadde VisitSunnhordland invitert til ein to dagar lang konferanse i Rosendal, der eit 30-tals personar frå ulike turistnæringar var samla for å få lansert den nye og unike merkevarestrategien for Sunnhordland. Etter ein betre lunsj, der den lokale Sunde-pølsa pryda menyen, samla reiselivsfølgjet seg i Folgefonnsenteret for ein to timar lang gjennomgang av den ferske strategien.

 

Fellesnemnar

Styrt av prosessleiarane Leif Egil Hem og Nina Iversen fekk gjestane servert dei nye ideane som det no skal jobbast etter, og arbeidet som var gjort for å koma fram til desse.

– Etter våre to tidlegare samlingar fekk vi inn det dykk meiner i ein SWOT-analyse med styrker, moglegheiter, svakheiter og trugsmål for Sunnhordland som turistdestinasjon. Og det som klart var ein fellesnemnar var kyst, sjø og øyer. For Sunnhordland er ei kystperlerike, sa Hem.