– Kritisk at noko blir gjort veldig snart

Kim Røssland, dagleg leiar for Herde kompositt AS i Ølve, ser store moglegheiter for bedrifta. Men slik stoda er no, med mellom anna skyhøge straumprisar, handlar det i staden om å overleva.

Det er krevjande tider for bedrifter over heile landet, noko som kom tydeleg fram under torsdagens dialogmøte mellom politikarar, kommuneadministrasjon og næringslivsrepresentantar på Husnes.

– Vi trudde vi skulle opp og fram etter pandemien, men i staden er situasjonen meir utfordrande enn nokon gong, konstaterte næringssjef Grete Solheim og ramsa opp faktorar som høge straumprisar, krig i Europa, prisstigning og vanskeleg å få tak i varer og tenester, samt mangel på tilgjengeleg arbeidskraft i mange bransjar.

– Situasjonen er svært utfordrande for mange lokale bedrifter. Det unormale har blitt det normale, sa Solheim.

Sterk merkevare

Alt dette stadfesta Kim Røssland frå Herde kompositt i eit innlegg til forsamlinga. Han byrja med å trekkja linene attende til selskapet sin oppstart i fjor vår.

– Vi stod overfor ei krise i fjor, Palfinger stod i fare for å bli lagt ned. Men vi var ein gjeng som hadde klokketru på vidare drift i Kvinnherad. No har vi skapt oss ei sterk merkevare og etablert oss i nye marknader. Vi er ikkje lenger ein livbåtprodusent, vi er ei komposittverksemd som kan laga kva som helst, understreka Røssland, og la til at bedrifta auka frå 49 til 70 tilsette i løpet av det fyrste driftsåret.

Han ytra også sterk ros til samarbeidet med Kvinnherad kommune og Kvinnherad næringsservice.

– Fantastisk! Anbefalast, smilte han.

Men han smilte ikkje då han fortalde om utfordringane som pregar næringslivet i dag.

– Det er ikkje noko som spelar på lag med næringslivet for tida. No handlar det meir om å overleva enn å utvikla seg, sa han ærleg.

Heilt galimatias

Røssland la heller ikkje skjul på kva som er det største problemet; straumprisane.

– Det er heilt galimatias, og indikasjonane framover er ikkje lysare, det går berre ein veg. Vi har ikkje moglegheit til å utvikla oss no. No handlar det berre om å overleva. For vår del er det kritisk at noko blir gjort, understreka han.

Kim Røssland nytta også høvet til å trekkja fram eit par andre moment som han meiner er viktige for vidare utvikling. Det eine er å skapa attraktive arbeidsplassar slik at ungdomen vil flytta heim. Det andre er tilrettelagt infrastruktur, til dømes Fjordmetroen.

– Det er uante moglegheiter der ute. Vi må berre koma i posisjon til å gripa dei moglegheitene, analyserte bedriftsleiaren.