Simonsen Bensin på Sæbøvik stenger dørene

Torsdag kveld gjorde eigarane og dei tilsette det kjent at stasjonen vart stengt frå dags dato.

«Vanskelege tider med korona, auka utgifter på blant anna straum og andre uføresette hendingar, har ført til at me ikkje lenger klarar å drifte stasjonen. Me har i lengre tid prøvd å finna gode løysningar for å kunna fortsetja drifta, men det har me diverre ikkje lykkast i», opplyste dei til kundane sine gjennom ein Facebook-status torsdag kveld.

På telefon får Grenda ei utfyllande forklaring frå Ole Martin Simonsen.

– Då koronaen kom forsvann alle oppsparte midlar, og sidan har me slite med likviditeten. Halsnøy som øysamfunn er dessutan avhengig av turistar, og i sommar har det vore mange dagar utan at det har vore folk innom i det heile. Me hadde håpa at denne sommaren kunne snu trenden, men det har ikkje blitt som forventa, seier han, før han legg til:

– Når ein i tillegg til sviktande omsetning får straumrekningar som er 10 gangar større enn vanleg, blir det vanskeleg.

Tolv mister jobben

Sjølv om dei har jobba med å finna løysingar dei siste månadane, har dei altså no valt å stenga dørene. Dette gjer at tolv personar, som har jobba i fulle og deltidsstillingar, samt som ringehjelp, mister jobben.

Innbyggjarane mister også ein samlingsplass.

– Stasjonen har vore ein polpulær samlingsplass for ungdommane spesielt, og det er ikkje mange slike på Halsnøy. Det er kjempeleitt at dette samlingspunktet no forsvinn, medgir Simonsen.

Når avgjersla om å stenga Simonsen Bensin er tatt håpar dei at nokon andre vil nyttegjera næringslokala til gode for lokalsamfunnet.