Resultata frå Folkehelseundersøkinga er klare
Dei fleste vaksne er nøgde med livet, men det er også utfordringar med einsemd og psykisk helse.
1. september vart resultata frå Folkehelseundersøkinga i Vestland 2022 presentert.
Det er over 53.000 innbyggjarar over 18 år som har svara på spørsmåla frå undersøkinga, kor 5905 av dei er frå Sunnhordland. 85 prosent av alle som har svart opplyser at dei er nøgde med livet.
Artikkelen held fram under annonsen.
«Det er ei klar betring samanlikna med ei undersøking i fylket under koronapandemien i november/desember 2020. Då svarde 74 prosent det same», skriv Vestland fylkeskommune dagen då resultata er klare.
Mange svar om god helse og trivsel
Spørsmåla vestlendingane har svara på har vore knytt til tenester og fasilitetar lokalt, fysisk og psykisk helse, helserelatert åtferd, sosialt miljø og livskvalitet. Den korte samanfattinga til fylkeskommunen er følgjande:
«Dei fleste vaksne i Vestland er nøgde med livet, opplever at dei har god helse og trivst i nærmiljøet. Ein av fire er fysisk aktive, og ni av ti har god tilgang til natur- og friluftsområde. Likevel er ein av ti einsame, og den psykiske helsa er prega av koronapandemien.»
– Det er gledeleg å sjå at innbyggjarane i fylket vårt stort sett har det bra og er nøgde med liva sine. Men vi ser også utfordringar, særleg når det gjeld sosial ulikskap i helse mellom utdanningsnivå. Dess høgare utdanning, dess betre kosthald og meir fysisk aktivitet. Det må vi prøve å gjere noko med. Det skal vere lett og rimeleg for alle å ta gode val for helsa, sa fylkesvaraordførar Natalia Golis då resultata vart presentert 1. september.
Særskilt for Sunnhordland
Rapporten viser at Vestland ikkje skil seg særskilt ut frå dei andre fylka i landet, men me som bur her er litt mindre nøgde med kor mykje gang- og sykkelsti som er utbygd enn i andre fylke. Det kjem også fram at det er litt færre vestlendingar som røyker eller snuser dagleg enn det er i andre fylke.
Sunnhordland scora elles dårleg på offentleg transport, kor berre 22% av dei som svara var nøgde med det tilgjengelege tilbodet.
Betre var det på spørsmål om natur og friluftsområde, kor Sunnhordlendingane er mest nøgd av alle regionar i fylket. Heile 95,1% har meldt om at natur- og friluftsområde eg godt eller svært godt tilgjengeleg.