Skal rehabilitere damluke

No har SKL byrja arbeidet med å senke Opstveitvatnet med 2 meter under lågaste regulerte vasstand.

Noregs vassdrags- og energidirektorat (NVE) har gjeve Sunnhordland Kraftlag (SKL) løyve til å senka Opstveitvatnet i Matre med 2 meter under lågaste regulerte vasstand i 6 veker i perioden mellom 29. august og 7. oktober.

Dette gjer dei for å kunne utføre rehabiliteringsarbeid på ei nedbroten damluke.

Kåre Røssland, som uttalar seg om saka for SKL, meiner det er lenge sidan Opstveitvatnet har vore så lågt som det vil vera dei neste vekene. Så vidt han er kjent med er det ikkje gjort noko vedlikehald på damluka sidan anlegget vart sett i drift.

– Teikningane er frå 1983, så det sto truleg ferdig midt på 1980-talet ein gong. Dette blir første gong me gjer noko vedlikehald på luka, og når me er ferdige skal det halda i mange år framover, seier Røssland.

Håpar på vedvarande godvêr

Det som skal skje når fyllingsgraden er nede på 2 meter under lågaste regulerte vasstand er at damluka skal få seg ein runde med sandblåsing og maling.

– Det er ein del arbeid med dette, og kor lang tid det tar heng i hop med vêret. No er det iallfall meldt fint, så det håpar me vil vedvara, slik at me får gjort arbeidet på ein god måte. Det er om lag 3 veker med arbeid, men blir det nedbør tar det lengre tid, forklarar Røssland vidare.

Kontrollert nedtapping

Grunnen til at dei skal rehabilitera damluka på Opstveitvatnet er fordi det vart kravd av NVE etter eit tilsyn. Luka var nedbroten og naturleg nok prega av fukt. For at luka skal vera tørr medan arbeidet pågår, vart SKL gjeve løyve til å senka vasstanden.

– Me må tappa ned vatnet forsiktig og kontrollert, mellom anna for å ta omsyn til elvane. Kor mykje vatn det er snakk om veit eg ikkje, men Opstveitvatnet har nok ikkje vore så nedtappa på mange, mange år, seier Røssland vidare, før han sluttar av:

– Når dette er gjort kjem Husnes Sandblåsing for å gjera rehabiliteringsarbeidet for oss. Me har brukt dei mykje og er trygge på at dei vil yta god service.