Festivaldag på folkehøgskulen

Tysdag var det lått og løye og fengande musikk ute på tunet på Sunnhordland folkehøgskule. Då var det duka for festivaldag for elevar og lærarar.

– Denne dagen er eigentleg eit resultat av koronatida, seier teaterlærar Eli Hårklau. Ved skulestart i fjor måtte elevane først i ein to veker lang karantene. Då karantenen var over, laga me til festivaldag for å feira dette. Det var så kjekt at me bestemte oss for å gjera det same i år.

Mykje å velja i

Det var ulike aktivitetar å ta del i. Under tuntreet var det music jam, der elevane kunne prøva seg i band. Her var ansiktsmåling, eller kritt-teikning på asfalten. Elles var det volleyball, svømmekonkurranse, strandrydding og bygging av gapahuk. Vart ein tyrst av all aktiviteten i den etterkvart så solrike dagen, kunne ein læska seg på smoothie frå juice-baren til lærar Alejandro Gómez. Dette fekk også ein liten delegasjon born og vaksne frå Espira Halsnøy Kloster Barnehage nyta godt av. Dei hadde vore på tur til Skarvasteinen denne dagen, og på veg attende til barnehagen, fekk dei kvar sitt glas med frisk fruktdrikk.

Kjekk festival

Rektor Bente Sjo er svært glad for slike dagar, og ser ikkje bort frå at ein slik festival kan kombinerast med konseptet "Open dag", der fastbuande frå øya blir inviterte til å komma og vera med. Sjølv syntest ho det var stor stas då skulane vart inviterte på FN-dag på folkehøgskulen då ho vaks opp.

- Eg skal henta sonen min når han er ferdig på skulen. Han fekk ikkje med seg fiskefestivalen på Sæbøvik i år, så nå får han vera med på denne festivalen i staden, seier ho nøgd.

Dagen vart toppa med grillmat ute, men det hasta ikkje med å avslutta festivaldagen. Det yrande livet fortsette ute på tunet og musikken kunne høyrast både langt og lenge.