– Den beste prestasjonen så langt

Damelaget til Rosendal imponerte med målfest, vakre scoringar og mykje godt spel.

Rosendal revansjerte tapet i serieopninga på sterkt vis då haustsesongen vart sparka i gang heime mot Norheimsund måndag kveld. Ved halvtid stod det 2-0 til vertane, etter to fantastiske scoringar. 1-0 var eit verkeleg lagmål, frå keeper via tre forsvarsspelarar, defensiv midtbane og til kant, før Maria Helland Hatteberg sette innlegget enkelt i mål.

– Play of the day, meinte trenarane Roar Musland og Håvard Sætrevik.

2-0 kom etter ei Tina Skår-kanon frå 25 meter, rett i krysset.

Utover i 2. omgang hadde kvittrøyene fleire gode sjansar til å auka til 3-0, men det lukkast fyrst etter 86 minuttar. Då kom Ingebjørg Haugland attende i målprotokollen berre ti veker etter at ho vart mor for fyrste gong. Dei neste par minutta scora Rosendal to gonger til, fyrst ved Cecilie Medhaug og til slutt ved Maria Helland Hatteberg. Sluttresultatet vart såleis heile 5-0.

Fekk betalt

– Dette er den beste prestasjonen vår så langt i år. Det er veldig kjekt å sjå spelarane få betalt for god treningsinnsats etter sommarferien, og det er tilsvarande kjekt å sjå at ein gjenskapar det vi trenar på i kamp, seier trenarane Roar Musland og Håvard Sætrevik.

– Spelarane som kom over frå Trio i vår har bidrege veldig godt sportsleg og sosialt, legg karane til.

Laurdag reiser Rosendal til Alvøen kunstgras for å møta serieleiaren i 5. divisjon, Loddefjord 2.

Rosendal – Norheimsund 5-0 (2-0)

9. min. 1-0 Maria Helland Hatteberg

18. min. 2-0 Tina Skår

86. min. 3-0 Ingebjørg Haugland

87. min. 4-0 Cecilie Medhaug

88. min. 5-0 Maria Helland Hatteberg

Rosendal (4-5-1)

Wiktoria Kondracka

Hedda Håheim Svendsen

Trude Havnerås

Celine Musland

Anita Simensen

Cecilie Medhaug GG

Ingeborg Solberg Flatebø G

Andrea Haugland Melheim

Tina Skår GGG

Ingebjørg Haugland

Maria Helland Hatteberg

Innb.: Synna Holmedal Gjerding, Inghild Christensen Sætrevik, Eileen Storækre Harsvik, Sophie Mehri