Slik kan den nye skulen på Husnes bli sjåande ut

Norconsult og Kvinnherad kommune har utarbeidd skisser for den nye barneskulen på Husnes. Byggjestart kan bli allereie i februar. Kostnaden er kalkulert til heile 257 millionar kroner.

Torsdag får formannskapet ei orientering om den planlagde barneskulen på Husnes. Nokre hovudpunkt og teikningar vart sendt ut onsdag. Der kjem det fram at skulen skal planleggast for 250 elevar, men det skal leggjast til rette for ei mogleg utviding til 350. Fellesareal og lærararbeidsplassar skal planleggjast for 350 elevar allereie i fyrste byggjetrinn, slik at ein berre treng utvida med trinnareal og klasserom i eit eventuelt 2. byggjesteg.

Det er elles skissert tre ulike løysingar for ei utviding til 350 elevar. Eit alternativ er tilbygg på kvar side av bygget, eit anna er tilbygg berre på vestre fløy, medan det siste dreiar seg om påbygg og tilbygg over to plan i mellomtrinnsfløya.

Vidare kan det nemnast at alle personalfunksjonar ligg i 2. etasje ved amfi/aula.

Når det gjeld materiala, vert det opplyst at ein ser for seg utstrekt bruk av tre – både på fasadane og veggane inne i bygget. Ein ynskjer også mykje bruk av glas for å få ein lys, open og transparent skule. Nokre tak vert planlagt med solcellepanel.

Prisstigning

Kalkylen no er på heile 257 millionar kroner inkludert moms og usikkerheitsavsetning. Det er noko høgare enn tidlegare estimat, og ein leitar derfor etter måtar å redusera prisen på.

«Ein arbeider no med å finna løysingar som kuttar i kostnaden, men som gjer at ein ikkje mistar kvaliteten på løysingane», står det i orienteringa.

Auken vert forklart med prisstigning på varer og tenester, større areal på bygget, ny veg og snuplass, bruer over bekk, innreiing og kunst, samt at det er lagt til rette for betre kvalitet og livssyklus-kostnader og mindre vedlikehald.

Ifølgje orienteringa kan det bli eit endeleg vedtak i kommunestyret 24. november i år. Byggefasen kan mogleg føregå frå februar 2023 til august 2024.