Vakt deg for KS sin limpinne!

Det er fort gjort å bli fanga i eit retorisk spel som eg undrar meg på om KS med vitande og vilje har lagt opp til i ordskifte som har spunne rundt i media den siste tida. Vi har alle vore vitne til KS og Utdanningsforbundet si ulike forståing for kor mange ukvalifiserte lærarar det er i skuleverket. Det er dessverre lite vi kan gjera med denne problemstillinga så lenge Opplæringslova har ei dør open til fordel for KS si tolking av lovverket.

Men desto viktigare er det at den meinige mann og kvinne er klar over kva konsekvensar det har for deira eigne born. Uavhengig av kven som eig sanninga har dessverre denne disputten tatt vekk noko av den viktige bodskapen knytt til konflikten vi står i.

Mindrelønnsutviklinga og erkjenninga av at denne har funne stad dei seks siste åra, vil ikkje KS bringe til torgs i debatten. Kjensla av at KS med viten og vilje ikkje har tatt innover seg kva følgjer dette får for våre medlemmer med lengst utdanning, er ikkje lenger berre ei kjensle men eit faktum.

KS si haldning utfordrar vår tillit og respekt. Det å bli sett, høyrd og verdsett av eigen arbeidsgjevar er viktige verdiar i det norske arbeidslivet. Mindrelønnsutvikla KS har akseptert dei siste seks åra er ei utvikling ein ansvarleg arbeidsgjevar ikkje kan vera seg kjend med. Signala dette gjev oss er grobotn for den kampviljen vi i dag er vitne til hjå medlemmene våre.

Til deg som er forelder som kjenner på ein frustrasjon for at lærarane streikar, vit at denne streiken handlar om framtida til dine born, og våre elevar. Streiken handlar om å bli verdsett for den utdanninga ein som lærar har tileigna seg, ei utdanning som gjer ein best mogleg kvalifisert for å ivareta retten dine barn har til god undervisning.

Rekruttering av kvalifiserte lærarar er særs urovekkjande og vi kan ikkje ta på oss ei «vent og sjå» haldning. Det er her og no problemet er, og det er våre leiarar som står i dei utfordringane denne mangelen fører med seg. Leiarane våre er uroa for om dei greier å innfri krava elevane har til forsvarleg opplæring.

Til deg som er politikar: Dette handlar ikkje om meg og mitt, men om oss og vårt. Dine barn, våre elevar, og samfunnet sine framtidige borgarar. Korleis kan de sjå på denne utviklinga og stillteiande akseptere ei manglande forståing for samanhengen mellom lønn, lærarrekruttering, og ein god skule for alle elever? I det komande valet vil vi ikkje lenger høyre berre flotte festtalar og tomme lovnader. Skal de satse på elevane - må de satse på lærarane!

Berit Dale

Leiarrepresentant

Utdanningsforbundet Vestland