Om posten i posthuset i Ølve
Torsdag 8. september kjem forfattaren Arne Eriksen til posthuset ved Dalssjøen i Ølve for å fortelja om lokal posthistorie.
«Den gamle postvegen mellom Bergen og Stavanger gjekk gjennom Ølve, med postopneri på garden Roaldstveit. Frå postkaien ved Dalssjøen gjekk posten vidare med båt over fjorden til Herøysundet», informerer arrangørane i ei pressemelding.
Hendinga er eit samarbeid mellom kulturnemnda i Ølve bygdelag og posthus-eigar Airin Zimmer.
Artikkelen held fram under annonsen.
– Sidan jonsok har gruveutstillinga vår halde til i det nyoppussa posthuset. Me synest det er på sin plass og heilt naturleg å også formidla lokal posthistorie i posthuset! helsar Eva Røyrane i kulturnemnda.
Postale spor
Når Arne Eriksen (f. 1956) gjestar Ølve skal han bidra til å formidla noko av den lokale post-historia. Føredraget hans har fått tittelen «Roaldstvedt Postaabneri – postale spor i landskap og kultur».
Noko av bakteppet for Eriksen si fordjuping blir vidare presentert i pressemeldinga:
«På 1800-talet voks det fram eit globalt, postalt nettverk som gjorde det mogeleg å senda brev mellom dei fleste avkrokar på jorda. Arne Eriksen har i mange år arbeidd med å kartleggja korleis dette fenomenet arta seg i Hordaland.»
Forfattaren er fødd i Stavanger og er i dag busett i Strandvik, kor han nyttar pensjonisttilværet til å fordjupa seg i og formidla postal historie.
Dette har til dømes resultert i bøkene Dar kjem dampen – med post (2011, med Audun Hanstveit), Send meg eit brev frå Hardanger (2013) og Feltpostinspektøren – posten i krig 1940 (2015).