Kartlegging av parkeringsbehov for kommunens tilsette og gjestar

Parkeringsavgifta på Husnes Storsenter har fått mange reaksjonar. I eit brev til dei forskjellige einingane vil kommunen sjå på moglegheiter for å utarbeida ein parkeringsstrategi for kommunens parkeringsplassar.

Rådgjevar for Samfunnsutvikling, Peder Sjo Slettebø, skreiv i brevet at «I samband med at Midgard-Gruppen innfører parkeringsavgift på sine areal i Husnes sentrum, ønskjer kommunedirektøren ei kartlegging av parkeringsbehov for kommunen sine tilsette mfl. i området. Dette med omsyn til eventuelle alternative parkeringsløysingar».

I brevet kom det òg fram at innføringa av P-avgift på Husnes var noko som kom brått på kommuneleiinga. Dei vart ikkje orientert om dette frå senterleiinga før det kom i lokalpressa.

– Det kom litt overraskande ja. Men parkeringsavgift er ein heilt vanlig ting å innføra når ein treng å regulera parkering. Det å parkera rett utfor døra, sånn som vi har gjort på Husnes i lang tid er ikkje ein sjølvfølgje. I lys av at senterleiinga innfører avgift, har kommunen no laga ei undersøking for å finna ut korleis vi best kan leggja til rette for parkering, seier kommunedirektør Ragnhild Bjerkvik.

I Kvinnherad må ein berre innfinna seg med at ein må ha bil, då kollektivsystemet ikkje er godt nok og strekningane er lange. Men vi har òg mykje å gå på når det gjeld samkøyring og liknande, meiner Bjerkvik.

– Det er ikkje ønskeleg med bilar heilt inne i sentrum. I alle sentrums-utviklingar vil ein legga meir til rette for sykkel og gåande. Derfor vil vi med denne undersøkinga sjå på om vi kan gjere noko for å få både tilsette i kommunen og dei som kjem til oss å nytta seg meir av sykkel, gange eller samkøyring, seier ho.

Ho understrekar også at det ikkje er alle som har moglegheit til verken sykkel eller gonge, og dei som treng å parkera nærast mogleg sjølvsagt skal ha sjans til det.

– Det er ein balanse-sak. Det skjer endringar i sentrums-bildet heile tida, og med nytt kollektivknutepunkt blir det kanskje òg endringar. Vi må berre legga til rette for at alle skal kunna koma til Husnes. Det er i grunn god parkeringskapasitet på Husnes, og vi ser no på løysningar som kan vere litt lenger vekke. Kan henda ein må gå litt, men det kan jo berre vere bra sett i eit helseperspektiv. Men vi må òg huska på at dei som ikkje kan gå så langt eller av eit eller anna grunn har behov for å parkera nærme skal ha moglegheit til det, sluttar ho.