Styrtregn-, flom- og lynvarsel

Som følgje av meldt styrtregn tysdag og onsdag, høge temperaturar og snøsmelting har NVE gått ut med flomvarsel for områda rundt breane i Vestland fylke.

Kvinnherad er merka med grønt farevarsel for flom dei komande dagane.

«Vassføringa rundt breane ligg høgt, som følgje av varmt vêr og bre- og snøsmelting. Desse vassdraga er difor ekstra utsett for styrtregnet som er varsla, og nivå rundt middelflom kan opptre», skriv Varsom.no i ei melding på Twitter.

Styrtregn og torevêr

Vêrmeldinga stadfestar at det kan koma styrtregn, ei melding som gjeld for heile Hordaland.

«Frå natt til tysdag til natt til onsdag er det venta periodar med kraftige regnbyer. Det er store lokale variasjonar i intensitet og mengd, og vêret kan endra seg raskt. Lokalt kan det koma 15-30 mm/t», melder Yr.

Varselet for Kvinnherad er merka gult, som tilseier at det er moderat fare for styrtregn tysdag og onsdag. Dei same dagane er det meldt fare for mykje lyn og torden i samband med regnbyene.