Fire borggårdskonsertar

Baroniet slår til med fleire store konsertar dei neste dagane. Både Ketil Bjørnstad, Ingebjørg Bratland og Thea Hjelmeland kjem på besøk.

Den hektiske veka startar med Ketil Bjørnstad bak klaveret fredag kveld. Konserten var opphavleg planlagt i Den røde sal, men er på grunn av stor pågang flytta ut i Borggården. Siste nytt er at billettane er utseld.

På tysdag tek Ingebjørg Bratland med seg bandet sitt til same stad, der dei like godt skal halda to konsertar på rappen.

– Ingebjørg Bratland er kjent for si stemme, unike songteknikk og formidlingsevne. Som 24-åring har Vinje-bygdingen allereie ei merittliste dei fleste kan misunna henne. Før platedebuten hadde ho eit etablert namn i folkemusikkmiljøet. Ho er kåra til nordisk meister, har vunne NM i folkemusikk, og har fleire sigrar i Landskappleiken som kveder, vert det opplyst på hennar heimeside.

 

Frå Førde

Torsdag 7. juli står Thea Hjelmeland med band på scena.

– Thea Hjelmeland byr på ei rik og variert blanding av folk-pop. Multi-instrumentalisten frå Førde byggjer på hennar eigne unike kreativitet i eit univers av gamle strengeinstrument, lagdelte vokalharmoniar og pulserande rytmar, med ei krystallklar stemme på toppen som syng historier om sorg og lengsel, håp og frykt, heiter det på Baroniet si heimeside.