Ikkje lenger rasfare

Stien i Bondhusdalen kan opnast igjen, etter at geologar meiner det ikkje er ytterlegare rasfare i området.

For snart to veker sidan gjekk det eit ras i Bondhusdalen, på vestsida av vatnet. Steinane fordelte seg på eit 150 meter breitt område, og mogleg byrja dei å rulla frå eit utgangspunkt cirka 400 meter over Bondhusvatnet.

Onsdag opplyser Kvinnherad kommune at geologar har vore på staden.

«Dei vurderer at det ikkje er knytt ytterlegare skredfare til raset som gjekk 24. juni. Kommunen har rådd politiet til å oppheva sperringa», skriv sektorleiar Anbjørn Høivik i ei pressemelding.

«Det er bratt terreng på staden, og dei som ferdast i området må ta omsyn til det, til dømes ved å unngå overnatting eller lengre opphald under bratte parti. Bondhusdalen er mykje besøkt av tilreisande, så kommunen vil saman med det lokale grunneigarlaget og nasjonalparkforvaltninga vurdera informasjonstiltak knytt til rasfare og andre aktuelle omsyn i området», legg Høivik til.