Sjarmerte og briljerte på Husnes Stadion

Deltakarane varta opp med stor idrettsglede, mykje engasjement og iherdig innsats då den andre utgåva av Løveleikane gjekk av stabelen på Husnes laurdag føremiddag.

Lionsklubbane Kvinnherad, Halsnøy og Stord Fitjar gjentok fjorårets debutsuksess og inviterte laurdag til det andre friidrettsstemnet for born og ungdom med utviklingshemming i rekkja. Også i år vart det eit vellukka stemne.

– Det var godt vêr og utruleg god stemning frå start til slutt med tilfredse deltakarar og funksjonærar, så vi er kjempenøgd etter det som var eit veldig bra arrangement, sa Agnar Melkersen i Lions Kvinnherad.

Stemnet opna til tonane frå Uskedal musikklag før ordførar Peder Sjo Slettebø ynskte deltakarane velkommen.

– Dette ser ut til å bli ein kjekk tradisjon her på dette flotte anlegget på Husnes. Det er kjekt og det skal vera kjekt å delta i idrett. Det viktigaste er ikkje å vinna, men at ein deltek og har det kjekt. Noko Løveleikane gjev ein god moglegheit til. Så takk til Lions som arrangerer, så gler eg meg til å sjå de i aksjon i dei ulike øvingane, sa Slettebø.

Ynskjer fleire deltakarar

Han fekk sjå 33 deltakarar som kjempa seg gjennom øvingane 400 meter, 60 meter, lengde, kast med liten ball og kulestøyt.

– Påmeldinga var mykje lik den vi hadde i fjor, så det einaste vi skulle ha ynskt var at det var fleire deltakarar som meldte seg på. Særskild frå Stord-området, som ikkje hadde nokon påmeldte i år. Det er litt skuffande, seier Melkersen.

No skal arrangementet evaluerast for å sjå på kva som kan gjerast for å få fleire deltakarar.

– Kanskje vi må sjå om det kan vera lurt å utvida litt og invitera fleire frå områda rundt. Men alle som deltok var veldig nøgd, og er klare på at dette vil dei ha meir av. Og det er det viktigaste, sa Melkersen.