Satsar på nye leikar neste år

Både bane og arrangør fekk høyra mykje vellæte i samband med opninga av nye Rosendal stadion og Rosendalsleikane i helga. Det vart også sett fleire rekordar.

Nokre minuttar etter at Sindre Solbakken Omvik søndag ettermiddag sprang i mål på 1.500-meteren, og med det avslutta den fyrste utgåva av Rosendalsleikane på 27 år, kunne endeleg Jonathan Varela Byrkjenes senka skuldrane og reflektera over den nye friidrettsbanen i bygda.

– Vi har fått veldig gode tilbakemeldingar på banen, og det er sett mange personlege rekordar. Og når vi i tillegg vart velsigna med fantastisk fint vêr, så kan det ikkje bli betre, smiler den daglege leiaren i Rosendal Turnlag.

Neste år

Fleire av idrettslaga har allereie varsla at dei vil koma attende neste år. Til dømes kan Ask Friidrett melda om ein svært vellukka tur både på banen og sosialt, og dei kjem gjerne attende. Ein annan kar opplyser at han vil anbefala idrettslag på Haugalandet om å reisa til Rosendal om eitt år.

– Eg vil retta ei stor takk til alle funksjonærarar og deltakarar, understrekar Byrkjenes.

– Er Rosendalsleikane komne for å bli?

– No skal vi ta ei vurdering og sjå kva som eventuelt kan gjerast betre, men målet mitt er absolutt at dette skal bli ei årleg hending. I år var det 155 deltakarar, men det er plass til fleire, så kanskje vi skal prøva og passera 200 neste år, opplyser Jonathan Varela Byrkjenes.

Styreleiar i RT og primus motor for baneprosjektet, Jostein Hatteberg, var rørt under opningsseansen laurdag.

– Eg er veldig glad for at vi no kan ta banen i bruk etter eit langt løp, sa han.

Hatteberg ynska spesielt å takka Trond Mohn og Sparebank1-stiftinga Kvinnherad for avgjerande støtte.

Nye rekordar

RT-eldsjel Kåre Eik har elles funne ut at det i helga vart sett 10 stemnerekordar og fire banerekordar. Dei sistnemnde er:

* 1500 meter: Sindre Solbakken Omvik, RT, med tida 3,54,82. (Tidlegare: Jostein Blenes, Huftar - 3,58,6 frå 1973).

* Lengde: Thea Leirfall Bremset, Stjørdal, med 5,69. (Tidlegare: Randi Nilsen, Askøy - 5,42 frå 1976).

* Høgde: Thea Leirfall Bremset, Stjørdal, med 1,73. (Tidlegare Anne Beth Espetvedt, Jarl i 1982 og Eva Furset, Vartdal i 1990 med 1,65).

* Kule 4 kg: Mariell Hetlesæter Morken, Voss, med 12,89. (Tidlegare Marit Rinnan, Gular - 11,23 frå 1990).

Jonathan Varela Byrkjenes vil vurdera nærare om ein heller skal skilja på gamal og ny stadion, slik at alle gamle rekordar vert ståande, og at den nye banen får si eiga rekordliste.