Mykje krangling i formannskapet

Det vart i overkant oppheta i formannskapet på torsdag. Alltid med Ap på eine sida og rådmannen eller ordføraren (eller begge) på andre sida. Budsjettet var ikkje noko unnatak.

Dei heftigaste ordvekslingane kom i sakene om Aksen, bustadpakken og budsjettet for 2017. I sistnemnde sak, som torsdag berre var ei orientering om stoda frå rådmannen, har det vore snakk om hemmeleghald, og Ap har etterlyst offentleggjering av verksemdene sine konsekvensutgreiingar. Rådmann Odd Ivar Øvregård stilte seg undrande til denne debatten.

– Eg har registrert at når vi lagar ein meir involverande prosess enn tidlegare, så meiner einskilde at vi har innført eit hemmelegheitskremmeri. Eg synest dette er ubehageleg å ha på seg. At det skal vera negativt å involvera dei tilsette, tykkjer eg er rart. Men alle er vel innforståtte med at så lenge ikkje rådmannen har lagt fram noko sak, så er det ikkje noko sak, kommenterte han.

 

Skuffa

Øvregård vedgjekk at ikkje alt har gått som ynska i budsjettprosessen, mellom anna så rekk han ikkje å få saka ferdig no i februar som tidlegare bestemt.

– Vi jobbar veldig godt med dette og har ein god prosess internt. Men det er vondt og vanskeleg sidan det må gjerast endringar som kjennest ubehagelege, sa rådmannen, og lova at ting vil vera klart tidlegare når ein kjem til neste års budsjett og organisasjonen har sett seg.

Hilde Enstad (Ap) var skuffa over at Øvregård ikkje greier å oppfylla punkt 18 i kommunestyret sitt vedtak frå desember. Der heiter det at rådmannen skal leggja fram konsekvensar av budsjettet i god tid før kommunestyret skal gjera vedtak i februar 2017.

– Eg håpar at rådmannen har forståing for at kommunestyret budsjetterte på ein annan måte før, og at vi bed om same informasjonen no som då, sa ho.

 

Andre agendaer

Men rådmannen reagerte sterkt på at Ap ikkje sa seg nøgd med det som kom fram i orienteringa hans.

– Eg sit med den opplevinga at det er andre agendaer som spelar inn, meldte han.

– Kva agendaer då? spurde Gretha Rød (Ap) sporenstreks, samstundes som ordføraren gav opp å styra debatten.

– Det veit eg ikkje, om det er strategiske eller kva. Eg er tillagt at eg vil halda noko hemmeleg for dykk. Men Peder får ikkje vita kva eg held på med, og han har ikkje meir informasjon om budsjettkonsekvensane enn dykk andre, svarte Øvregård.

Det høyrer med til historia at Peder Sjo Slettebø tidlegare på kvelden hadde kommentert akkurat dette.

– Eg vil understreka at korkje eg eller varaordføraren har meir innsyn i kommunale dokument enn resten av formannskapet, sa han då.

Marit Årthun (KrF) avslutta med å lesa opp eit innlegg ho hadde skrive før debatten.

– Eg synest framdrifta i budsjettarbeidet ser ok ut, og vi må ha forståing for at det tek tid, oppmoda ho.

 

– Ikkje ute etter å ta nokon

Ap avviser ikkje påstanden om at dei har ein agenda, men meiner den er identisk med rådmannen sin.

– Vi har ein agenda, det er derfor vi er med i politikken. Men vi meiner den er den same som rådmannen sin, nemleg å jobba for å gjera Kvinnherad betre på alle område.

Det seier Gretha Rød etter at rådmannen i formannskapsmøtet mistenkte at Ap hadde skjulte motiv for kritikken, spesielt om budsjettet.

– Vi er ikkje ute etter å ta nokon, men vi ynskjer å få informasjon på bordet om det kommunen held på med, legg ho til.

– Så det handlar ikkje om å markera seg?

– Ikkje i det heile. Det blir for dumt å måtta snakka om dette, vi bør heller konsentrera oss om saker som kan føra Kvinnherad vidare, sukkar Gretha Rød.

 

Les mykje meir om formannskapsmøtet i Grenda på tysdag.